Մինչեւ ժամը 18։00-ն «Իմ քայլը» խմբակցությանը ժամանակ ենք տալիս, որպեսզի պատվիրակությունով ներկայանա՝ Հայրենիքի փրկության շարժման ղեկավարության հետ քննարկելու երկրում ստեղծված իրավիճակը։ Այս մասին, այսօր՝ դեկտեմբերի 22-ին, Նիկոլ Փաշինյանի հրաժարականի պահանջով ընդդիմության հանրահավաքում հայտարարեց ՀՅԴ ԳՄ ներկայացուցիչ Իշխան Սաղաթելյանը:
«Հաշվի առնելով, որ այս շենքում նստած է ընդամենը մի խելագար դավաճան, մենք ստեղծված իրավիճակից լուծումներ գտնելու համար առաջարկում ենք. մինչեւ ժամը 18։00-ն «Իմ քայլը» խմբակցությունը ներկայանա՝ մեր հետ երկրում ստեղծված իրավիճակը քննարկելու համար»,- ասաց Իշխան Սաղաթելյանը:
«Մենք գիտենք, որ իրենցից շատերը խուճապի մեջ են, ունեն այդ տրամադրությունը։ Իրենց մեջ կան բազմաթիվ մարդիկ, որոնք գնահատում են ստեղծված իրավիճակը։ Մենք այդ հնարավորությունը տալիս ենք իրենց՝ գալ սեղանի շուրջ քննարկել ստեղծված իրավիճակը։ Քննարկման թեման՝ վարչապետի պաշտոնանկությունը, ստեղծված իրավիճակից ելքեր գտնելը։ Հույս ունենք, որ պատգամավորներն ունեն այդ խոհեմությունը, հակառակ դեպքում իրենք ամբողջապես կիսում են այս շենքում նստած խելագար դավաճանի գործած պատասխանատվությունը։ Իրենք դեռ ունեն հումանիտար միջանցք, դեռ ունեն հնարավորություն՝ միանալու ժողովրդի պահանջին»,- նշեց Սաղաթելյանը։
Նա հայտնեց, որ ՀՀ մարզերում կան բազմաթիվ մայրուղիներ, որոնք փակված են. «Կան բազմաթիվ գործարաններ, ընկերություններ, որոնք գործադուլ են հայտարարել։ Պայքարն ամբողջապես շարունակվում է»։
