Ադրբեջանի՝ կոշտ ու կտրուկ քայլերից է հենց մարտի 5–ին տեղի ունեցած դիվերսիոն գործողությունը: Այս մասին NEWS.am-ի հետ զրույցում ասաց ՀՅԴ խմբակցության ղեկավար Արթուր Մոսիյանը:
«Չեն բացառվում, որ առաջիկայում նույնպես կլինեն այդպիսի սադրանքներ: Իսկ դա հնարավոր է Հայաստանի այդ ՔՊ-ական ղեկավարության լուռ համաձայնության պայմաններում: Երբեմն տպավորություն է ստեղծվում, որ Ալիեւն ու Փաշինյանը պայմանավորված են անում այս ամենը»,- նշեց Մոսիյանը:
Անդրադառնալով ադրբեջանական կողմի փոխանցմանը, թե Արցախը կամ ընդունում է ինտեգրացիոն քաղաքականությունը, կամ լինելու են կոշտ եւ կտրուկ քայլեր, Մոսիյանն ասաց.
«Այսպիսի կտրուկ քայլերը հանգեցնելու են էսկալացիայի, որովհետեւ արցախցիներն իրենց ասելիքն արդեն ասել են: Մենք որեւէ պարագայում չենք կարող ինտեգրվել Ադրբեջանին: Արցախցին իր ինքնորոշման հարցն արդեն լուծել է: Այս ամենը Նիկոլի եւ իր վարչախմբի խղճին է, որովհետեւ նրանք Արցախից իրենց ձեռքերը լվացել են եւ տպավորություն է, որ Ալիեւի հետ միասին են այս գործողություններն անում»:
Արթուր Մոսիյանն ասաց, որ արցախյան կողմը ադրբեջանական կողմի հետ հանդիպմանը օրակարգային 4 հարցով էր գնացել, որոնց մեջ ներառված էր Կաշենի հանքավայրի վերաշահագործումը, ինչը մերժվել է:
Նշենք, որ Արցախի Հանրապետության նախագահ Արայիկ Հարությունյանը Անվտանգության խորհրդի ընդլայնված նիստին հայտարարել էր, որ ստեղծված իրավիճակի հումանիտար եւ ենթակառուցվածքային խնդիրները քննարկելու նպատակով ռուս խաղաղապահ զորակազմի հրամանատարության միջնորդությամբ եւ ներկայությամբ՝ փետրվարի 24-ին արցախյան կողմը հանդիպել է ադրբեջանական կողմի հետ: Ապա պայմանավորվածություն է ձեռք բերվել երկրորդ հանդիպման կապակցությամբ, որը տեղի է ունեցել մարտի 1-ին՝ Անվտանգության խորհրդի քարտուղար Սամվել Շահրամանյանի գլխավորությամբ:
«Երկրորդ հանդիպման ժամանակ Ադրբեջանի ներկայացուցիչը փորձել է քննարկել քաղաքական թեմաներ՝ օգտագործելով ինտեգրացիա բառը, սակայն պարոն Շահրամանյանը կանխել է՝ ասելով, որ եթե պետք է քննարկեն քաղաքական հարցեր, դա պետք է լինի Ադրբեջանի կողմից Արցախի անկախության ճանաչման թեման: Նա հավելել է, որ քաղաքական հարցերի քննարկման համար իրենք լիազորված չեն եւ տվյալ հանդիպմանը չեն կարող քննարկել այդպիսի հարցեր»,- ասել է Արայիկ Հարությունյանը:
Երկրի ղեկավարի խոսքով՝ դրանից հետո ադրբեջանական կողմը իր խողովակներով փոխանցել է իրենց, որ կամ ընդունում են ինտեգրացիոն քաղաքականությունը, կամ առկա խնդիրներին որեւէ լուծում չի լինելու, հակառակը՝ լինելու են ավելի կոշտ եւ կտրուկ քայլեր:
Հիշեցնենք, որ մարտի 5-ի առավոտյան Արցախի ՊԲ-ն հաղորդագրություն էր տարածել՝ հայտնելով, որ ժամը 10։00-ի սահմաններում ադրբեջանական զինուժի դիվերսիոն խումբը «Խայփալու» կոչվող տեղանքում թիրախավորել եւ կրակ է արձակել ՆԳՆ ոստիկանության անձնագրային եւ վիզաների վարչության անձնակազմի հերթափոխի մեքենայի վրա։
Թշնամու գործողությունների հետեւանքով զոհվել են փոխգնդապետ Արմեն Մայորի Բաբայանը, մայոր Դավիթ Վալերիի Դանիելյանը, լեյտենանտ Արարատ Թելմանի Գասպարյանը:
Լեյտենանտ Դավիթ Աշոտի Հովսեփյանը ստացել է կրծքավանդակի հրազենային վիրավորում։ Վիրավոր ոստիկանը վերակենդանացման բաժանմունքում է, նրա վիճակը կայուն ծանր է՝ թույլ դրական դինամիկայով։
