Մայր Աթոռը խորապես մտահոգված է օրերս Երևանի սինագոգի հրկիզման փորձի միջադեպի մասին տեղեկությամբ։ Կրոնական հաստատությունների և պաշտամունքի վայրերի նկատմամբ որևէ տեսակի ոտնձգություն դատապարտելի է և չի կարող արդարացվել որևէ հանգամանքով կամ իրադրությամբ։ Այդ մասին ասաց Մայր Աթոռի տեղեկատվական համակարգի տնօրենի պաշտոնակատար Տեր Համբարձում քահանա Դանիելյանը՝ ի պատասխան NEWS.am-ի հարցին, թե ինչպես կմեկնաբանի Երևանում հրեական սինագոգի դռները հրկիզելու փորձը:
«Կրոնական այլատյացությունն ու անհանդուրժողությունը մերժելի են, և երբևէ տեղ չեն գտել մեր հասարակության մեջ։ Մեր ազգը հարուստ փորձառություն ունի ապրելու այլ կրոնների և մշակույթների միջավայրում, աշխարհի զանազան երկրներում և դարեր շարունակ խաղաղ գոյակցել ու համագործակցել է տարբեր ժողովուրդների հետ։ Հուսով ենք, որ կատարվածի առնչությամբ իրավապահ մարմինները կշարունակեն անհրաժեշտ քայլերը ձեռնարկել և ցավալի այս միջադեպը որևէ կերպ չի ներազդի Հայաստանում հրեական համայնքի հոգևոր կյանքի ու ապահով կեցության վրա»,- նշեց նա։
