Սպիտակ տան Ազգային անվտանգության խորհրդի ներկայացուցիչ Էդրիեն Ուոթսոնն արձագանքել է Վրաստանի նախագահ Սալոմե Զուրաբիշվիլիի կողմից օտարերկրյա գործակալների մասին օրենքի վրա դրված վետոյին։
«Մենք ուրախ ենք տեսնել, որ նախագահ Զուրաբիշվիլին հավատարիմ է Վրաստանի եվրաատլանտյան ապագային՝ վետո դնելով օտարերկրյա գործակալների մասին օրենքի վրա։ Մենք կոչ ենք անում խորհրդարանի անդամներին ցուցաբերել նույն քաջությունը և չչեղարկել նրա վետոն», - ասվում է Սպիտակ տան խոսնակի հայտարարության մեջ:
Ավելի վաղ վետոյի մասին լուրին արձագանքել էր Եվրոպական խորհրդի ղեկավար Շառլ Միշելը։
Ըստ նրա, թափանցիկության օրենքի վրա Վրաստանի նախագահի դրած վետոն հետագա մտորումների տեղիք է տալիս։
«Ներկայիս տեսքով օրենքը չի համապատասխանում ԵՄ արժեքներին և ուղուն։
Ես կոչ եմ անում Վրաստանի բոլոր քաղաքական գործիչներին և առաջնորդներին օգտագործել այս հնարավորությունը և ապահովել, որ Վրաստանը մնա եվրոպական ճանապարհին, որին աջակցում է ժողովուրդը»,- հայտարարել է Միշելը:
Վրաստանի նախագահ Սալոմե Զուրաբիշվիլին երեկ վետո է դրել «Օտարերկրյա ազդեցության թափանցիկության մասին» օրենքի վրա։
«Այս օրենքը որևէ փոփոխության կամ բարելավման ենթակա չէ, հետևաբար դրա վրա շատ պարզ վետո է դրվում։ Այս օրենքը պետք է չեղյալ համարվի»,- հայտարարել է նախագահը։
Վերջերս Վրաստանի խորհրդարանն ընդունեց «Օտարերկրյա ազդեցության թափանցիկության մասին» օրենքը։ Օրինագծին կողմ է քվեարկել 84 պատգամավոր, դեմ՝ 30-ը։ Օրենքը լայնածավալ բողոքի ցույցեր է առաջացրել ողջ երկրում:
