նախընտրելի դարձնելԹիվ 12 ընտրատարածքում մեծամասնական ընտրակարգով առաջադրված, ԲՀԿ անդամ Լյովա Խաչատրյանի համար քարոզարշավը շատ անհրաժեշտ էր եւ հետաքրքիր, առավել եւս, երբ այն տարբերվում էր նախորդ քարոզարշավներից իր սառնությամբ, անտարբերությամբ: Այս մասին Լյովա Խաչատրյանն ասաց այսօր՝ մայիսի 2-ին, լրագրողների հետ հանդիպման ժամանակ: Նրա խոսքով՝ նախորդ քարոզարշավների ժամանակ ինքը մարդկանց մեջ խանդավառություն էր նկատում, թեկնածուների կողմից եւս կար քարոզարշավը բուռն անցկացնելու ձգտում: «Այս անգամ կարծես մենակ էի իմ ընտրատարածքում, փորձեցի հասցնել պարզապես շատ հանդիպումներ ունենալ»,-ասաց նա:
Լ. Խաչատրյանի խոսքով՝ անցյալ անգամվա նման հիմնարկ- ձեռնարկություններում չհաջողվեց հանդիպումներ ունենալ, հիմնական հանդիպումները բակերում էին, ինչպես նաեւ մեկ մեծ հանդիպում Գագիկ Ծառուկյանի ներկայությամբ:
Ըստ ԲՀԿ-ական թեկնածուի, ինքն անցկացրել է լիարժեք քարոզարշավ, պարզապես կցանկանար ճանապարհին հանդիպել տեսակետների, գաղափարների բախման, ինչը չեղավ: Իսկ թե ինչն էր պատճառը, պատգամավորության թեկնածուն ունի իր բացատրությունը. «Երբ վազորդները թույլ են լինում, երբեք ռեկորդ չի սահմանվում»:
Իսկ իր մրցակիցներն, ըստ Խաչատրյանի, «կամ ասելիք չունեին, կամ ասելու ձեւը չունեին»: Նա թեկնածուներից միայն մեկին է ճանաչում՝ Անահիտ Բախշյանին, ով որոշակի քարոզարշավ արեց:
Լյովա Խաչատրյանը չցանկացավ առանձնացնել հիմնական մրցակիցներին՝ նշելով, որ բոլորն էլ մրցակից են, քանի որ առաջադրվել են:
«Հիմնական մրցակիցս ժամանակն էր, ես այն հաղթահարեցի: Թվում էր, թե դժվար կլինի այս փոքր ժամանակահատվածում, բայց պարզվեց, որ ինձ շատերը ճանաչում են, հետեւում են մամուլին, ինձ լավ գիտեն՝ որպես պատգամավորի, որպես քաղաքական գործչի»,- նշեց նա:
NEWS.am-ի հարցին, թե ի՞նչ արդյունքներ է ակնկալում մայիսի 7-ին, ո՞վ կհաղթի, նա պատասխանեց, որ կհաղթեն կատարված աշխատանքները, գործունեությունը եւ ներկայացված ծրագրերը:
«Ամենամեծ հաղթանակը կլինի մայիսի 6-ի երեկոյան, երբ ողջ ժողովուրդը միմյանց շնորհավորի, դա կլինի ոչ միայն իմ, այլեւ հայ ժողովրդի ամենամեծ հաղթանակը»,- նշեց նա:
Նշենք, որ թիվ 12 ընտրատարածքում առաջադրվել է «Ժառանգությունից» Անահիտ Բախշյանը, ՀՅԴ-ից Կառլեն Գեւորգյանը, ԲՀԿ-ից Լյովա Խաչատրյանը, ՕԵԿ-ից Ռոբերտ Մասումյանը, ՀԱԿ-ից Տիգրան Տեր-Պետրոսյանը, անկուսակցական, լրագրող Գոհար Վեզիրյանը:
Լուսանկարը` Սոնա Բարսեղյանի
