Եվրոպայի և ԱՄՆ-ի պաշտոնյաները համակերպվել են այն մտքի հետ, որ Ուկրաինայում պատերազմը կձգձգվի մինչև հաջորդ տարի՝ ընդունելով, որ ամերիկյան վերջին խաղաղարար նախաձեռնությունը արձագանք չի գտել նախագահ Վլադիմիր Պուտինի մոտ, գրում է Bloomberg-ը։

Պարբերականի աղբյուրների խոսքով՝ Պուտինը մտադիր է ձմեռային շրջանում ուժեղացնել հարձակումները Ուկրաինայի վրա՝ փորձության ենթարկելով թե՛ հենց երկիրը, թե՛ նրա դաշնակիցների վճռականությունը։ Գործակալության զրուցակիցները կարծում են, որ Դոնալդ Թրամփի հատուկ բանագնացներ Սթիվ Ուիթկոֆը և Ջարեդ Քուշները անցած հանգստյան օրերին Մոսկվայում և Կիևում էական առաջընթացի չեն հասել, իսկ Ռուսաստանի նախագահը նրանց այցն օգտագործել է՝ Պետդումայի ընտրություններից առաջ ուժ ցուցադրելու համար։

Եռակողմ բանակցությունները կարող են վերսկսվել խորհրդարանական ընտրություններից հետո, սակայն, Bloomberg-ի զրուցակիցների կարծիքով, այդ քննարկումները դժվար թե էապես մոտեցնեն խաղաղության համաձայնագրի կնքումը։

Երեքշաբթի Պուտինը հեռախոսազրույց է ունեցել ԱՄՆ նախագահ Դոնալդ Թրամփի հետ։ Ուկրաինայի նախագահ Վլադիմիր Զելենսկին հայտարարել է, որ հույս ունի սեպտեմբերի վերջին հանդիպել Թրամփի հետ։ Ռուսաստանը եռօրյա դադարից հետո վերսկսել է հարվածները Կիևի ուղղությամբ։

Ինչպես ենթադրել է Bloomberg-ի աղբյուրը, առաջիկա կես տարվա համար Ռուսաստանի ծրագիրը նախատեսում է ուժեղացնել հարվածները Ուկրաինայի էներգետիկ և ջերմային ենթակառուցվածքի օբյեկտների վրա՝ բնակչության կյանքը անտանելի դարձնելու նպատակով, ինչպես նաև իրականացնել հիբրիդային հարձակումներ և միջամտել Եվրոպայի գործերին՝ նպատակ ունենալով թուլացնել Կիևին դաշնակիցների աջակցությունը։

Կրեմլի առաջնորդը հույս ունի, որ հաջորդ գարնանը իր դիրքերն ավելի կամրապնդվեն, իսկ ռուսական տնտեսությունը կկարողանա պահպանել կայունությունը, գրում է պարբերականը։ Լուրջ բանակցությունները դժվար թե սկսվեն մինչև հաջորդ տարի, ասել է դրա աղբյուրներից մեկը։

Այդ պատճառով եվրոպական երկրները ծրագրում են ձեռք բերել Patriot համակարգերի համար հրթիռներ՝ օգնելու Կիևին ձմռանը հետ մղել ուժգնացող հարձակումները։ «Մենք պետք է պատրաստ լինենք երկարատև հակամարտության և այն բանին, որ Ուկրաինայի կարիքները կպահպանվեն առաջիկա ամիսներին և տարիներին», — երեքշաբթի Ուկրաինայի պաշտպանության հարցերով կոնտակտային խմբի նիստում հայտարարել է ԱՄՆ պաշտպանության նախարարի տեղակալ Էլբրիջ Քոլբին։