նախընտրելի դարձնելՀայաստանի վարչապետ Տիգրան Սարգսյանը Ծաղկաձորում մասնակցել է Հայաստանի երիտասարդական հիմնադրամի նախաձեռնությամբ կազմակերպված «Բազե-2012» 10-րդ հոբելյանական երիտասարդական հավաքի բացման արարողությանը, որին մասնակցում են 18-30 տարեկան շուրջ 400 երիտասարդներ` Հայաստանից, Լեռնային Ղարաբաղից, Ջավախքից եւ սփյուռքից։
ՀՀ կառավարության անունից ողջունելով «Բազե-2012» հավաքի մասնակիցներին եւ շնորհավորելով «Բազե»-ի 10-ամյակի առթիվ` վարչապետը նշել է. «Այս տասը տարիների ընթացքում շարժման ծավալած գործունեությունը մշտապես գտնվել է մեր պետության ուշադրության կենտրոնում, քանի որ սա յուրահատուկ գործիք է, որը հնարավորություն է տալիս համախմբել երիտասարդներին: Շարժման շնորհիվ ծնվում են բազմաթիվ նոր հետաքրքիր նախաձեռնություններ: Այսօր երիտասարդական քաղաքականություն իրականացնելիս մեծ ուշադրություն ենք դարձնում այն նախաձեռնություններին, որոնց հեղինակները հենց երիտասարդներն են, իսկ այդպիսի նախաձեռնություններ ցույց տալու համար անհրաժեշտ է հարթակ, որտեղ երիտասարդները կարողանում են հավաքվել, կազմակերպել տարբեր հարցերի քննարկում, ստեղծել անմիջական մթնոլորտ եւ միջավայր: Համոզված եմ, որ դա ոչ միայն այսօր է տալիս իր դրական պտուղները, այլեւ ձեր մեջ ձեւավորում է հայրենասիրության եւ ինքնակազմակերպման ունակությունների կուտակման կարեւոր ներուժ, ինչն ապագայում կյանքում ձեզ էապես օգնելու է եւ օժանդակելու: Շնորհավորում եմ բոլորիս շարժման 10-ամյակի կապակցությամբ եւ մաղթում, որ այս հիասքանչ օրերի ընթացքում հանդես գաք նոր նախաձեռնություններով եւ վերադառնաք լիցքավորված: Համոզված եմ, որ այդ լիցքը կարողանալու եք հաղորդել նաեւ մեր պետությանն ու հասարակությանը»։
Վարչապետ Սարգսյանը Հայաստանի երիտասարդական հիմնադրամի եւ «25 ակումբ» երիտասարդական հասարակական կազմակերպություն նախաձեռնած «Կամավոր անվարձահատույց արյունատվության քարոզչություն» ակցիայի շրջանակում արդեն հինգերորդ անգամ արյուն է հանձնել։ Այնուհետեւ կառավարության ղեկավարը ներկա է գտնվել «Բրեյն-ռինգ»-ի մրցումին: Վարչապետին ուղեկցել են Երեւանի քաղաքապետ Տարոն Մարգարյանը եւ Կոտայքի մարզպետ Կովալենկո Շահգելդյանը:
Տասը տարվա ընթացքում «Բազե-2012» համահայկական հավաքին մասնակցել է շուրջ 8000 երիտասարդ: Այս տարի առաջին անգամ ջոկատներ են ընդգրկվել նաեւ մարզերում գործող բուհերը եւ միջին մասնագիտական ուսումնական հաստատությունները ներկայացնող երիտասարդներ։ Մասնակիցները, համախմբվելով ՀՀ պետական դրոշի գույների ներքո, ուժերը կչափեն մարզական տարբեր խաղերում, ինտելեկտուալ ու մշակութային մրցույթներում, ինչպես նաեւ հանդիպումներ կունենան ՀՀ պետական, քաղաքական ու հասարակական գործիչների հետ։ Հոբելյանական հավաքին նախատեսված է տոնական ծրագիր եւ հանդիպումներ հին բազեականների հետ: Կցուցադրվի նաեւ 10-ամյա «Բազեի» տարեգրությունը ներկայացնող ֆիլմ:
Տիգրան Սարգսյանը Ծաղկաձորի «Ծաղկունյաց» հրապարակում ներկա է գտնվել նաեւ Լեոնիդ Ենգիբարյանի արձանի հանդիսավոր բացման արարողությանը:
Նշենք, որ 2012 թ. օգոստոսի 10-15-ը Ծաղկաձորում Երեւանի մնջախաղի պետական թատրոնը, Ազգային թատերական ստեղծագործական միավորումը եւ Ծաղկաձորի քաղաքապետարանը` ՀՀ մշակույթի նախարարության աջակցությամբ անցկացնում են Լ. Ենգիբարյանի անվան մնջախաղի միջազգային 3-րդ փառատոնը, որին մասնակցում են մնջախաղի թատերախմբեր եւ անհատ մնջախաղացներ Հայաստանից, Դանիայից, Լեհաստանից, Իտալիայից, Ճապոնիայից, Ղազախստանից: Մնջախաղի միջազգային փառատոնը հիմնադրվել է 2008 թ. եւ անցկացվում է Ծաղկաձորում երկու տարին մեկ անգամ: 2010 թվականից այն կրում է Լեոնիդ Ենգիբարյանի անունը:
