նախընտրելի դարձնել
«Տաթեւ» զբոսաշրջային կենտրոնի առկա իրավիճակը տեղում ուսումնասիրելու եւ Տեղ գյուղի դպրոցի հիմնանորոգման աշխատանքներին ծանոթանալու նպատակով, նոյեմբերի 30-ին, ՀՀ քաղաքաշինության նախարար Սամվել Թադեւոսյանի գլխավորած աշխատանքային խումբն այցելեց Սյունիքի մարզ:
Քաղշիննախարարության մամուլի ծառայությունից հայտնում են, թե ՀՀ քաղաքաշինության նախարար Սամվել Թադեւոսյանը Սյունիքի մարզպետ Սուրեն Խաչատրյանի հետ, շրջայց կատարեց Տաթեւ համայնքում: Հաշվի առնելով, Տաթեւ գյուղական համայնքի վարչական սահմաններում առանձնացված տարածքների քաղաքաշինական գործունեության հատուկ կարգավորման կարգավիճակը, քաղաքաշինության նախարարը շեշտեց իրականացվելիք շինարարական աշխատանքների կարեւորությունը:
Տեղեկացնենք, որ ՀՀ կառավարության որոշմամբ «Տաթեւ» վանական համալիրը եւ հարակից` Խոտի, Շինուհայրի, Հալիձորի, Տաթեւի, Սվարանցի, Տանձատափի, Աղվանիի եւ Բարձրավանի գյուղական համայնքները հայտարարվել են «Տաթեւ» զբոսաշրջային կենտրոն` ստանալով քաղաքաշինական գործունեության հատուկ կարգավորման կարգավիճակ:
Օրվա երկրորդ կեսին, նախարար Սամվել Թադեւոսյանը ծանոթացավ Տեղ գյուղի դպրոցի շինարարության ընթացքին` կարեւորելով դպրոցի հիմնանորոգման աշխատանքների ժամանակին եւ որակով հանձնելու հանգամանքը: Դպրոցի հիմնանորոգման շրջանակներում կբարեկարգվի նաեւ դպրոցի տարածքը, կտեղադրվեն ջեռուցման կաթսաներ, կիրականացվեն կաթսայատան եւ ցանկապատի կառուցման աշխատանքներ:
