նախընտրելի դարձնելԻրաքի նախագահ Ջալյալ Թալաբանիի առողջությանը կհետեւի բրիտանական բժիշկների խումբը, որը երկիր կժամանի դեկտեմբերի 19-ին, հայտնում են արաբական հեռուստաալիքները:
Հիշեցնենք, որ 79-ամյա Թալաբանին (քուրդ) հիվանդանոց էր տեղափոխվել նախօրեին՝ առողջության կտրուկ վատթարացման պատճառով, եւ պառկած է Բաղդադի հիվանդանոցի ինտենսիվ թերապիայի հիվանդասենյակում: Հաղորդվել էր, որ նա սրտի կաթված է ստացել: Տեղի լրատվամիջոցները մի քանի անգամ լուրեր են տարածել նրա մահվան մասին: Ավելի ուշ նախագահի գրասենյակից հերքել են այդ «լուրերը»:
Այնուհետեւ ելույթ է ունեցել պետության ղեկավարի գրասենյակի ղեկավար Նասիր Անին, որը վստահեցրել է, որ Թալաբանիի վիճակը կայուն է եւ աստիճանաբար կարգավորվում է, հաղորդում է ԻՏԱՌ-ՏԱՍՍ-ը:
Ըստ բուժող բժիշկների պաշտոնական հայտարարության` համակողմանի հետազոտության արդյունքները «լավատեսություն են ներշնչում»: Մինչդեռ հիվանդանոցում մի շարք աղբյուրներ պնդում են, որ նա մինչ այժմ ծանր, անգիտակից վիճակում է:
