Բրիտանական Օքսֆորդ կոմսության բնակիչ, 10 տարի Սանտա Կլաուս աշխատած տղամարդուն ազատել են  զբաղեցրած պաշտոնից, քանի որ վերջինս երեխաներին պատմել է, որ աշխարհում հրաշքներ չկան: 

Տղամարդը երկար տարիներ Սանտա Կլաուս է աշխատել բրիտանական Նյոնհեմ Քուրթենե  գյուղում գտնվող առեւտրի կենտրոնում: Նրա կարիերայի վերջն է դարձել Վենդի եւ Սթիվեն Քեննեթ երեխաների հետ շփումը: Հայրը Սանտային իր երեք երեխաներից յուրաքանչյուրի համար վճարել է գրեթե վեց ֆունտ, սակայն  ծնողները խիստ հիասթափվել են, երբ երեխաներն արցունքն աչքերին իրենց մոտ են վազել, գրում է The Sun-ը:

Նրանք ձմեռ պապին ասել են, որ ամբողջ տարին իրենց լավ են պահել եւ այդ պատճառով էլ նվերների են արժանի: Իսկ Սանտա Կլաուսը հոգոց է հանել եւ հայտարարել, որ երբեմն լավ երեխաների հետ էլ են վատ բաներ պատահում, օրինակ` ԱՄՆ-ի դպրոցում սպանված երեխաները: Դրանից հետո նա երեխաներին ասել է, որ Սանտա Կլաուս ընդհանրապես գոյություն չունի, իսկ Նոր տարվա եւ Սուրբ ծննդի նվերները գնում են ծնողները, հայտնում է  vesti.ru-ն:

Քեննեթ ընտանիքը բողոքել է  առեւտրի կենտրոնի ղեկավարությանը, եւ   դերասանն ազատվել է աշխատանքից: Որպես փոխհատուցում` առեւտրի կենտրոնի ղեկավարությունը տուժած հաճախորդներին  նվիրել է  Լոնդոնի զվարճանքների այգու  տոմս: