նախընտրելի դարձնելԴեկտեմբերի 31-ին Ֆրանսիայի պաշտպանության նախարար Ժան Իվ Լե Դրիանի նախատեսված այցն Աֆղանստան կասկածի տակ է հայտնվել ֆրանսիական պարենային ընկերության պատճառով: Այցի մասին նախատեսվում էր հայտարարել վերջին պահին` անվտանգության նկատառումներից ելնելով: Սակայն Paysan Breton ընկերությունը գաղտնազերծել է այն՝ լրագրողներին պատմելով, որ Նոր տարվա առթիվ որոշել է ութ հազար նրբաբլիթ ուղարկել Աֆղանստանում ծառայող ֆրանսիացի զինվորներին, իսկ դրանք դեկտեմբերի 31-ին անձամբ տեղ է հասցնելու Լե Դրիանը:
Le Figaro թերթը գրում է, որ նախարարի այցն Աֆղանստան առայժմ չի հետաձգվել: Ընդ որում, գերատեսչությունում նշում են, որ չեն նեղացել Paysan Breton-ից եւ ըմբռնումով են մոտեցել, որ ընկերությունը «ցանկացել է որքան հնարավոր է արագ հայտնել ուրախալի լուրը», մեջբերում է «Ինտերֆաքսը»:
Paysan Breton-ի ղեկավարությունում պարզաբանում են, որ հավանաբար սխալի պատճառը ընկերության աշխատակիցների եւ պաշտպանության նախարարության աշխատակիցների փոխադարձ թյուրըմբռնումն է եղել:
Արեւմտյան բարձրաստիճան պաշտոնյաների այցերն Աֆղանստան, ինչպես նաեւ տարածաշրջանի այլ անհանգիստ պետություններ, ավանդաբար գաղտնի են պահվում մինչեւ վերջին պահը` անվտանգության նկատառումներից ելնելով: Հաճախ դրանց մասին հայտնի է դառնում VIP-անձի՝ այդ երկիր ժամանելու պահին:
