Նախընտրելի
ԱՄՆ-ն ցանկանում է Ռուսաստանի հետ հարաբերությունները «բնականոն հուն» վերադարձնել:
Մյունխենում Անվտանգության կոնֆերանսի շրջանակում կայացած հանդիպման ժամանակ այդ մասին Սերգեյ Լավրովին հայտնել է ԱՄՆ-ի փոխնախագահ Ջոզեֆ Բայդենը: Վաշինգտոնը հարաբերությունների կարգավորումն սկսելն առաջարկում է տարաձայնություններից զուրկ բնագավառներում համագործակցությունից: Նման բնագավառներից մեկն է զանգվածային ոչնչացման զենքի տարածման դեմ պայքարը, հայտնում է «Կոմերսանտը»:
Ռուսական պատվիրակության աղբյուրը «Կոմերսանտին» պատմել է, որ Ջոզեֆ Բայդենը Լավրովին հայտնել է Ռուսաստանի հետ հարաբերությունները «բնականոն հուն» վերադարձնելու ԱՄՆ-ի մտադրության մասին:
ԱՄՆ-ի եւ Ռուսաստանի շահերի համընկնման ոլորտներից մեկն է զանգվածային ոչնչացման զենքի տարածման դեմ պայքարը: ՌԴ-ի իշխանությունները վճռել են չերկարացնել հունիսին ավարտվող Նանա-Լուգարա ծրագրի գործողության ժամկետը, որի շրջանակներում 1990-ականների սկզբից ԱՄՆ-ի միջոցներով վերացվում էին ռուսական միջուկային զինամթերքների մնացորդները: Մոսկվայի որոշումը պատճառաբանվում է այն փաստով, որ նա այլեւս սուբսիդիայի կարիք չունի: Մինչդեռ ռուսական պատվիրակության աղբյուրը «Կոմերսանտին» հայտնել է, որ Մոսկվան Վաշինգտոնի հետ կարող է ստորագրել այդ բնագավառում համագործակցության նոր համաձայնագիր, «եթե այն հիմնված լինի իրավահավասարության վրա եւ համապատասխանի արդի իրողություններին»:
Ապագա համաձայնագրի քննարկման համար փետրվարին Մոսկվա կժամանի պետքարտուղարի ավագ տեղակալ Ռոուզ Գեթեմյուլլերը:
