նախընտրելի դարձնել
Ոչ Լեռնային Ղարաբաղը, ոչ Հայաստանը երբեւէ չեն քաղաքականացրել եւ չեն քաղաքականացնում Ստեփանակերտի օդանավակայանի բացումը: Այս մասին հայտարարել է Հայաստանի ԱԳ նախարար Էդվարդ Նալբանդյանը` անդրադառնալով NEWS.am-ի այն դիտարկմանը, թե վերջերս երկու-երեք եվրոպացի պատգամավորներ անհանգստություն են արտահայտել Ստեփանակերտի օդանավակայանի բացման վերաբերյալ, որ դա կարող է ազդել բանակցային գործընթացի վրա:
Ստորեւ ներկայացնում ենք Էդվարդ Նալբանդյանի մեկնաբանությունը.
«Եթե այդ երկու-երեք վերոհիշյալ պատգամավորներն իսկապես անհանգստանում են բանակցությունների ընթացքի համար, ապա պետք է առնվազն հետաքրքրվեն այդ գործընթացով, ծանոթ լինեն ԵԱՀԿ Մինսկի Խմբի եռանախագահների մոտեցումներին: Իսկ կոնկրետ այս հարցի վերաբերյալ եռանախագահները բազմիցս կողմերին կոչ են արել զերծ մնալ ուժի կամ ուժի սպառնալիքի կիրառումից քաղաքացիական ինքնաթիռների նկատմամբ եւ որ օդանավակայանի բացման հարցը չպետք է քաղաքականացնել: Իսկ ո՞վ է սպառնում: Ադրբեջանը: Ո՞վքեր են քաղաքականացնում: Ադրբեջանը եւ նրա հորդորներով այս կարգի հայտարարություններ անողները:
Եթե այդ պատգամավորները իսկապես անհանգստացած են տարածաշրջանային անվտանգությամբ եւ կայունությամբ, ապա ինչո՞ւ երբեւէ անհանգստություն չեն արտահայտել Ադրբեջանի ռազմատենչ հռետորաբանության եւ քաղաքականության, սադրիչ գործողությունների առչությամբ։ Ի՞նչ էին ասում այդ նույն պատգամավորները Սաֆարովյան տխրահռչակ գործարքի վերաբերյալ։ Նրանք կամ լռում կամ անգամ արդարացնում էին Ադրբեջանին, երբ ամբողջ աշխարհը միահամուռ դատապարտում էր Բաքվին:
Ինչո՞ւ են այս պատգամավորները այսպես վարվում: Կարծում եմ, որ այս հարցի պատասխանը թե՛ մենք, ինչպես նաեւ հենց իրե՛նք շատ լավ գիտեն:
Մեր դիրքորոշումն այս հարցի կապակցությամբ շատ հստակ է՝ ոչ Լեռնային Ղարաբաղը, ոչ Հայաստանը երբեւէ չեն քաղաքականացրել եւ չեն քաղաքականացնում Ստեփանակերտի օդանավակայանի բացումը։ Ստեփանակերտի օդանավակայանը միայն քաղաքացիական եւ մարդասիրական նպատակների համար է»:
