Փետրվարի 9-ին, ժամը 18.45-ին, ոստիկանության Վանաձորի բաժին է դիմել 36-ամյա մի կին եւ հայտնել, որ նախորդ օրը, ժամը 16.30-ի սահմաններում, անհայտ անձը Վանաձոր քաղաքի Պարույր Սեւակի փողոցի խանութներից մեկում բացահայտ հափշտակել է իր պարանոցի ոսկյա շղթան` խաչով, եւ դիմել փախուստի` պատճառելով 250.000 դրամի նյութական վնաս:

Ոստիկանության մամուլի ծառայությունից  NEWS.am-ին հայտնում են, որ նույն օրը կինը փողոցում նկատելով եւ ճանաչելով կողոպտչին՝ դիմել է ոստիկանություն:

Ոստիկանության Վանաձորի եւ Գուգարքի բաժինների ծառայողների համատեղ  միջոցառումների շնորհիվ նույն օրը, ժամը 19.00-ին, Վանաձորի Ավետիսյան փողոցից  բերման է ենթարկվել 22-ամյա Անդրանիկ Վ.-ն:

ՀՀ քրեական օրենսգրքի 176 հոդվածի  1-ին մասի հատկանիշներով հարուցվել է քրեական գործ:

Անդրանիկ Վ.-ն ձերբակալված է: Կատարվում է նախաքննություն: