Վերջին շաբաթվա ընթացքում հանրապետությունում շարունակվում են արձանագրվել սուր շնչառական վարակներով պայմանավորված հիվանդացության աճ` գրեթե 2,5 անգամ (փետրվարի 18-24-ը` 5033, փետրվարի 25-ից մարտի 3-ը` 10688): Այն պայմանավորված է ինչպես առողջության առաջնային պահպանման կազմակերպություններ, այնպես էլ հիվանդանոցներ բնակչության ակտիվ դիմելիությամբ եւ գրիպի ու սուր շնչառական վարակների սեզոնայնության այժմյան օրինաչափությամբ:

Առողջապահության նախարարությունից հայտնում են, թե չնայած բժշկական օգնության եւ սպասարկման կազմակերպություններ բարձր դիմելիությանը, նշված հիվանդություններով նվազում են շտապօգնության կանչերը` ինչպես սուր շնչառական վարակների, այնպես էլ թոքաբորբերի դեպքերում:

Իրականացվող մշտադիտարկման եւ համաճարակաբանական վերլուծության արդյունքներով` ներկայումս հանրապետության բժշկական օգնության եւ սպասարկման կազմակերպությունուններում բուժում են ստանում.

Մարզերում`

սուր շնչառական վարակներով 214 հիվանդ,

թոքաբորբերի թեթեւ ձեւերով 98 հիվանդ,

Երեւանում`

սուր շնչառական վարակներով 353 հիվանդ,

թոքաբորբի թեթեւ ձեւերով 106 հիվանդ:

Երեւանի ինտենսիվ թերապիայի բաժանմունքներում բուժում է ստանում 20 հիվանդ, որոնց վիճակը հիմնականում գնահատվում է միջին ծանրության։ Միայն մեկ հիվանդի վիճակն է գնահատվում ծանր` պայմանավորված ուղեկցող հիվանդություններով  եւ ուշ դիմելիությամբ:

Կազմակերպված եւ իրականացված լաբորատոր հետազոտությունների արդյունքում արձանագրված դեպքերի գրեթե 70%-ը պայմանավորված է գրիպի Ա տեսակի H1N1 ենթատեսակով, 20%-ը` գրիպի Բ տեսակով: Իրականացված լաբորատոր հետազոտությունների արդյունքում պարզվել է, որ հանրապետությունում շրջանառում են նաեւ շնչառական այլ վարակների հարուցիչներ` ռեսպիրատոր սինտիցիալ վիրուսներ:

Համաճարակաբանական վերլուծության արդյունքները վկայում են այն մասին, որ հիվանդացության աճը պայմանավորված է բնակչության կողմից գրիպի եւ սուր շնչառական վարակների կանխարգելմանն ուղղված միջոցառումների ոչ հետեւողական իրականացմամբ (հիվանդների աշխատանքի, ուսումնական հաստատություններ հաճախումը, միջոցառումներին մասնակցությունը եւ այլն)` չնայած ՀՀ առողջապահության նախարարության բազմաթիվ հորդորներին:

Կարեւորելով վերը նշվածը եւ հաշվի առնելով գրիպի եւ սուր շնչառական վարակների փոխանցման օդակաթիլային մեխանիզմը, ինչպես նաեւ ներկայումս սուր շնչառական վարակներով հիվանդացության աճը` ՀՀ առողջապահության նախարարությունը կրկին հորդորում եւ հիշեցնում է.

• գրիպանման երեւույթների առկայության դեպքում մնալ տանը, չհաճախել աշխատանքի, դպրոց, մանկապարտեզ, բարձրագույն ուսումնական հաստատություններ

• չմասնակցել զանգվածային միջոցառումներին, որը կարող է պատճառ դառնալ հիվանդի վիճակի վատացման եւ նոր դեպքերի առաջացման ու տարածման

• չշփվել գրիպանման երեւույթներով անձանց հետ

• եթե շրջապատում առկա է գրիպով հիվանդ` պահպանել 2մ հեռավորություն

• չզբաղվել ինքնաբուժմամբ, անհարկի չօգտագործել հակաբիոտիկներ, կազմակերպել բժշկի այցը տուն

• պահպանել հազալու եւ փռշտալու վարվելակարգը

• խստորեն հետեւել անձնական հիգիենային

• հագնվել եղանակին համահունչ

• հաճախակի օդափոխել փակ տարածքները: