Հայ ազգային կոնգրեսի համագումարը կարեւոր ժամանակահատվածում է տեղի ունենում՝  ներքին եւ արտաքին գործընթացների մեջ, վստահ եմ, որ այն արգասաբեր աշխատանքով կարեւոր որոշումներ կկայացնի եւ կուղղորդի  կազմակերպությունը երկրի արտաքին ու ներքին մարտահրավերները հաղթահարելու ուղղությամբ: Այս մասին այսօր՝ ապրիլի 13-ին, ՀԱԿ հիմնադիր համագումարին ասաց ՀՅԴ խմբակցության ղեկավար Արմեն Ռուստամյանը:

Նա նշեց, որ  գրեթե մեկ տարի է, ինչ  ԱԺ-ում աշխատում են միասին, ունեն համագործակցության լավ փորձ: «Այդ համագործակցությունը բխում է մեր երկրի առջեւ կանգնած խնդիրները համատեղ լուծելու մարտավարությունից, անկեղծ ցանկությունից: Անկախ մեր ունեցած տարբերություններից, մեկ բանում համոզված ենք, որ այսպես այլեւս շարունակվել չի կարող: Պետք է մեր երկիրը փոխենք այնպես, որ կասեցվի ահագնացող արտագաղթը, արյունաքամ է լինում մեր ժողովուրդը, մեր հայրենիքում սկիզբ դնել մի գործընթացի, որ բոլորիս երազած Հայաստանն ունենանք օր առաջ: Այդպիսի համագործակցության բոլոր հիմքերը կան»,- ասաց նա:

Արմեն Ռուստամյանն ասաց, որ առաջիկա ընտրություններին միասնական դիրքորոշումներով պետք է հասնել նրան, որ օգտագործվի այս պատեհ առիթը, որ Երեւանում հաստատվի ընդդիմադիր իշխանությունը»:  Նրա խոսքով՝  ընդդիմադիր գործիչները պետք է ճիշտ գնահատեն իրավիճակը, որ հաջողեն: «Եթե չստացվեց նախընտրական դաշինքը, կարելի է խոսել հետընտրական դաշինքի մասին: Ուրախ եմ, որ ՀԱԿ-ի գործիչներն էլ են դա կարեւորում: Եթե հնարավոր չլինի անմիջապես ընտրել ընդդիմադիր քաղաքապետ, դա հնարավոր է անել ավագանու ներսում` հետընտրական դաշինք ունենալով»,- ասաց Արմեն Ռուստամյանը:

Լուսանկարը՝  Արսեն Սարգսյանի/NEWS.am