նախընտրելի դարձնելԱդրբեջանը մտադիր է հաջորդ տարի նախատեսվող Եվրոպայի Խորհրդի նախարարների կոմիտեում ստանձնելիք նախագահությունն օգտագործել հակահայկական քարոզչություն իրականացնելու նպատակով: Դրա մասին են վկայում Ադրբեջանի մի շարք պաշտոնյաների հայտարարությունները, որոնք բավականին անհանգստացած են այդ կառույցում Հայաստանի նախագահությունից: Հիշեցնենք, որ Հայաստանը ԵԽ Նախարարների կոմիտեում նախագահությունն ստանձնել է մայիսի 16-ից:
Ինչպես «Էխո»-ին հայտարարել է ադրբեջանցի իրավապաշտպան Սաիդա Գոջամանլին, Ադրբեջանը ԵԽ-ում ստանձնելով նախագահությունը, կներկայացնի «բոլոր անհրաժեշտ փաստարկները` մասնավորապես Հայաստանի կողմից մեր հողերի շրջափակման, փախստականների կարգավիճակի եւ այլնի վերաբերյալ»:
«Իր հերթին մարդասեր եւ խաղաղասեր Եվրոպան Հայաստանի գործողությունների հանդեպ չպետք է անտարբեր մնա: Այսօր ողջ միջազգային հանրությունը գիտի, որ Հայաստանն օկուպանտ երկիր է: Ադրբեջանը պետք է պնդի իր առաջնահերթությունները եւ հասնի իր հողերի վերադարձմանը»,- պարզաբանել է նա` չմանրամասնելով, թե ինչու պետք է Ադրբեջանն ինչ-որ փաստարկներ ներկայացնի, եթե «ողջ միջազգային հանրությունը տեղյակ է»: Միեւնույն ժամանակ «քաղաքական նորարարությունների եւ տեխնոլոգիաների կենտրոնի» ղեկավար Մուբարիզ Ահմեդօղլուն հայտարարել է, որ ԵԽ-ում նախագահությունը չունի կարեւոր իավասություններ: «Այդ պատճառով ես չեմ կարծում եմ, որ Հայաստանը կկարողանա ինչ-որ բան առաջ քաշել ղարաբաղյան հակամարտության հետ կապված: Մի խոսքով՝ Ադրբեջանը զգուշանալու կարիք չունի»,-ասել է նա:
Ընդգծենք, որ ԵԽ նախարարների կոմիտեում նախագահությունը վեց ամիսը մեկ անցնում է այբբենական կարգով հաջորդ պետությանը: Ադրբեջանը կնախագահի ԵԽ նախարարների կոմիտեում 2014թ. մայիս-նոյեմբերին:
