նախընտրելի դարձնել
ԱՄՆ նախագահ Դոնալդ Թրամփը կարծում է, որ Ռուսաստանը և Ուկրաինան մոտենում են հակամարտության կարգավորման շուրջ համաձայնագրի կնքմանը։ Նա հնարավոր է համարել, որ համաձայնությունը կարող է ձեռք բերվել մինչև դեկտեմբերին կայանալիք G20-ի գագաթնաժողովը։ Այս մասին ԱՄՆ առաջնորդը հայտարարել է բլոգեր Բենի Ջոնսոնին տված հարցազրույցում։
«Կարծում եմ՝ մենք շատ մոտ ենք գործարք կնքելուն... Շատ մեծ հավանականություն կա, որ կկարողանանք կարգավորել այս հարցը», — ասել է Թրամփը։
Պատասխանելով մինչև «Մեծ քսանյակի» գագաթնաժողովը համաձայնագիր կնքելու հնարավորության մասին հարցին՝ ԱՄՆ նախագահը չի բացառել նման սցենարը։
Միաժամանակ, նա նշել է, որ Ռուսաստանի նախագահ Վլադիմիր Պուտինի և Ուկրաինայի նախագահ Վլադիմիր Զելենսկու միջև խոր թշնամանք է պահպանվում։
G20-ի գագաթնաժողովը նախատեսված է անցկացնել դեկտեմբերին Ֆլորիդայում՝ Թրամփին պատկանող Trump National Doral հանգստավայրի տարածքում։ Ավելի վաղ լրատվամիջոցներում ենթադրություններ էին հայտնվել, որ միջոցառումը կարող է հարթակ դառնալ Մոսկվայի և Կիևի միջև համաձայնագրի կնքման համար։
