նախընտրելի դարձնելԱյսօր՝ մայիսի 31-ին, Հայաստանի երիտասարդական հիմնադրամում տեղի է ունեցել Dasaran.am կրթական ծրագրի «Նոր սերնդի դպրոց-2013» մրցույթի ամփոփումն ու հանդիսավոր մրցանակաբաշխության արարողությունը:
ԿԳՆ մամուլի ծառայությունից հայտնում են, որ միջոցառմանը մասնակցել է նաեւ ՀՀ կրթության եւ գիտության նախարար Արմեն Աշոտյանը, ով ընթերցել է ՀՀ վարչապետ Տիգրան Սարգսյանի ուղերձը հանդիսության մասնակիցներին: Նախարարն իր հերթին, շնորհավորելով բոլոր հաղթող դպրոցներին, նշել է. «Ակնհայտ է, որ Dasaran.am կայքը սովորական կայք չէ, այն կրթական էլեկտրոնային գործիք է, որը կարելի է ներկայացնել անգամ ամենաառաջադեմ միջազգային մանկավարժական հանրույթին: Այն կրթական, գիտական եւ տեղեկատվական արդյունք է, արգասիք, որը, ինչու չէ, կարելի է վաճառել արտաքին աշխարհում եւ հասանելի դարձնել նաեւ եվրոպական երկրներին: Մենք ունենք նման հեռանկար, եւ նախարարությունն իր պատրաստակամությունն է հայտնում` ապագայում եւս իր աջակցությունը ցուցաբերելու սույն էլեկտրոնային միջավայրի զարգացմանը եւ արտահանմանը: Այսինքն, մենք ոչ միայն միջազգային մանկավարժական մտքի սպառող ենք, այլ նաեւ մատակարարող եւ արտահանող: Ուրախալի է, որ պետություն-մասնավոր հատված համագործակցության շրջանակում ստացել ենք նման ժամանանակից գործիք: Մաղթում եմ, որ Dasaran.am տիրույթում մոտ ապագայում ներառվեն Հայաստանի բոլոր դպրոցները, որն էլ իր հերթին թույլ կտա ավարտին հասցնել ընդհանուր էլեկտրոնային միջավայրի կառուցման եւ կայացման աշխատանքները, գերժամանակակից եւ շատ օգտակար գործիքները հասանելի դարձնել յուրաքանչյուր աշակերտի եւ ծնողի համար»:
Նախարարը շնորհակալություն է հայտնել ինչպես Dasaran.am-ի աշխատակազմին, այնպես էլ ծրագրում ներգրավված բոլոր դպրոցների տօրեններին եւ ուսուցիչներին, ծնողներին եւ աշակերտներին, ովքեր, ըստ Արմեն Աշոտյանի, շունչ են հաղորդում ծրագրին: Նախարարը նաեւ ներկաներին հավաստիացրել է, որ պետության աջակցությունն այս խնդրում կկրի շարունակական բնույթ. նախատեսվում են նոր անակնկալներ եւ ծրագրեր: «Նոր սերնդին անհրաժեշտ է նոր դպրոց, եւ ակնհայտ է, որ այդ դպրոցը կերտելու ենք միասին»,-ընդգծել է Արմեն Աշոտյանը:
«Նոր սերնդի դպրոց-2013» մրցույթի առաքելությունն է` բարձրացնել ՀՀ դպրոցներում ուսուցչական անձնակազմի համակարգչային գիտելիքների մակարդակը, խթանել դպրոցներում տեղեկատվական տեխնոլոգիաների ակտիվ օգտագործումը, խրախուսել դպրոցներում Dasaran.am կրթական ծրագրի կողմից տրամադրված էլեկտրոնային միջավայրի լիարժեք կիրառումը, իսկ ծնողների համար ապահովել աշակերտների առաջադիմության վերաբերյալ տեղեկատվության հասանելիությունն ու թափանցիկությունը:
Մրցույթին մասնակցել են Dasaran.am կրթական ծրագրին այս պահին միացած բոլոր 757 դպրոցները, որոնցից հաղթող են ճանաչվել այն դպրոցները, որոնց ուսուցչական անձնակազմն ամենաարդյունավետն է վարում էլեկտրոնային մատյանը` ժամանակին կատարելով գնահատականների, տնային հանձնարարությունների եւ բացակայությունների մուտքագրումը:
Մրցույթի հանդիսավոր մրցանակաբաշխության արարողության ժամանակ առաջին 50 հորիզոնականները զբաղեցրած դպրոցները ստացել են բազմաթիվ մրցանակներ, այդ թվում` համակարգիչներ, խրախուսական նվերներ եւ պատվոգրեր: Հաղթող է ճանաչվել է Գյումրիի թիվ 44 դպրոցը:
