Մեկնարկել են «Վարդավառ 2013» փառատոնի նախապատրաստական աշխատանքները: Փառատոնը տեղի է ունենալու հուլիսի 7-ին` Սիրահարների այգում:

«Վարդավառ 2013» փառատոնի նպատակն է վերականգնել սիրված տոնն իր ազգային ծեսերով ու ավանդույթներով:

Միջոցառման ընթացքում կազմակերպվելու են հետաքրքիր խաղեր ու մրցույթներ, ինչպես նաեւ լուսանկարահանում հանրաճանաչ մարդկանց կողմից, որի մասնակիցները որոշակի գումար կնվիրաբերեն: Հավաքված գումարը Վորլդ Վիժն Հայաստան բարեգործական կազմակերպության օգնությամբ կուղղվի թիրախ գյուղում ջրամատակարարման խնդրի լուծմանը:

Նախաձեռնության հեղինակներ` ՄԱՐՕԳ մարքեթինգ ընկերությունը եւ դիզայներ Արա Ասլանյանը նպատակ ունեն վերականգնել տոնի մոռացված բաղկացուցիչները եւ մատնանշել ազգայինը:

Հին ժամանակներում Վարդավառը համախմբել է մարդկանց. սիրահար տղան ու աղջիկն  այդ օրը հնարավորություն են ունեցել ազատ տեսնվել, տարբեր ազգեր, հարուստ ու աղքատ, բարեկամ ու թշնամի նստել են նույն սեղանի շուրջ. հարսը ջրել է սկեսրոջն ու սկեսրայրին, սանիկը` սանամորը: Տոնը միավորել է բոլորին անկախ ամեն ինչից ու սփռել սեր, հանդուրժողականություն ու հավասարություն: