Երեւանի քաղաքապետարանի 2013 թվականի ծրագրով մայթերի վերանորոգման աշխատանքներ են  նախատեսվել մայրաքաղաքի Աբովյան, Արամի, Իսահակյան, Ալեք Մանուկյան, Չարենցի, Տերյան, Ամիրյան, Կորյունի, Սարյան, Խորենացիի, Թումանյան փողոցներում, Մաշտոցի եւ Սայաթ-Նովայի պողոտայում եւ Դավթաշենի այգում:

Քաղաքապետարանի մամուլի ծառայությունից հայտնում են, որ 12550 քմ մակերեսով մայթեր արդեն իսկ վերանորոգվել են, տեղադրվել են բետոնե նոր սալիկներ, որոշ հատվածներում վերատեղադրվել ու ամրացվել են նախկին սալիկները: Ամբողջությամբ փոխվել են նաեւ Շառլ Ազնավուրի անվան հրապարակի սալիկները`2650 քմ մակերեսով: Տեղադրման համար օգտագործվում են 6.0 սմ հաստությամբ բետոնե սալիկներ, որոնց որակը պարտադիր պետք է բավարարի  մրցույթով սահմանված տեխնիկական պահանջները: Մայթերի ու հրապարակների սալիկապատման աշխատանքները նախատեսվում է ավարտել  2013 թվականի 3-րդ եռամսյակում: