Վերաքննիչ դատարանում, օգոստոսի 12-ին, կկայանա Պռոշյանի գյուղապետ Հրաչ Մուրադյանի սպանության մեջ մեղադրվող Արայիկ Պետրոսյանի բողոքի լսումը: Այս մասին NEWS.am-ի թղթակցի հետ զրույցում ասաց Պետրոսյան եղբայրների փաստաբան Գիվի Հովհաննիսյանը:

Նրանք բողոքարկում էին Կենտրոն եւ Նորք Մարաշ ընդհանուր իրավասության դատարանի կալանավորման որոշումը:

Ինչ վերաբերում է նրա եղբորը` խուլիգանության մեղադրանքով ազատազրկված Արտակ Պետրոսյանին, ապա դատարանը օրերս երկարացրել է նրա կալանքը եւս երկու ամսով: Փաստաբանը նշեց, որ պատրաստվում են այս որոշումը բողոքարկել Վերաքննիչ դատարանում:

Վերաքննիչ դատարանում հաջողության չհասնելուց հետո նրանք պատրաստվում են դիմել նաեւ Վճռաբեկ դատարան, իսկ հայաստանյան դատական ատյանները սպառելուց հետո` Մարդու իրավունքների եվրոպական դատարան:

Գիվի Հովհաննիսյանն ասաց, որ իր պաշտպանյալններն արդեն մոտ 4-5 ամիս է` ազատազրկված են, սակայն որեւէ քննչական գործողություն չի եղել, իսկ նրանց կալանքների ժամկետները «հենց այսպես երկարաձգվում են»:

Հիշեցնենք, որ ապրիլի 2-ի առավոտյան 9.00-ի սահմաններում Պռոշյանի գյուղապետարանի դիմաց հայտնաբերվել է Պռոշյանի գյուղապետ Հրաչ Մուրադյանի դին` աջ քունքի շրջանում հրազենային վնասվածքով: Դեպքի առթիվ  հարուցվել է քրեական գործ 104-րդ հոդվածի 2-րդ մասի 2-րդ կետի հատկանիշներով (սպանություն` անձի կամ նրա մերձավորի` կապված այդ անձի կողմից իր ծառայողական գործունեության կամ հասարակական պարտքի կատարման հետ)  եւ 235-րդ հոդվածի 1-ի մասի (ապօրինի կերպով հրազեն, բացի ողորկափող հրազենից եւ դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) հատկանիշներով: Տարածքում պարկուճներ չեն հայտնաբերվել:

Ձերբակալվել են նույն գյուղի բնակիչներ Արայիկ եւ Արտակ Պետրոսյանները: Որպես հիմնական կասկածյալ, լրատվամիջոցներում շրջանառվում էր նաեւ գյուղապետի մրցակից Արթուր Մուրադյանի անունը:

Ապրիլի 5-ին Արայիկ Պետրոսյանը կալանավորվել էր, իսկ քրեական գործով վարույթ իրականացնող մարմնի որոշման հիման վրա Արտակ Պետրոսյանն ազատվել էր արգելանքից: Գործով կալանավորված Արայիկ Պետրոսյանի դեմքից եւ քթից, ինչպես նաեւ նրա կողմից դեպքի օրը շահագործված «ՎԱԶ-2121» մակնիշի ավտոմեքենայի սրահից՝ առջեւի աջ կողմի մեջտեղի հենակի ներսի կողմից, առջեւի ձախ դռան շրջանակից եւ պաստառի ներսի կողմից, համեմատական հետազոտության նպատակով խծուծների վրա վերցված նմուշներում դատաքիմիական փորձաքննությամբ հայտնաբերվել են կրակոցի արգասիքներ հանդիսացող անտիմոնի մետաղացման հետքեր:

Արգելանքից ազատվելուց օրեր անց Արտակ Պետրոսյանը ձերբակալվել, ապա` կալանավորվել էր խուլիգանության մեղադրանքով: Դա կապված է սեպտեմբերի 23-ին տեղի ունեցած ՏԻՄ ընտրություններից հետո Պռոշյանի սպանված գյուղապետ Հրաչ Մուրադյանի եւ նրա ՀՀԿ-ական մրցակից Արթուր Մուրադյանի միջեւ տեղի ունեցած վիճաբանության հետ, այդ ժամանակ նա դեպքի վայրում է եղել: