Հայաստանի կառավարության որոշմամբ սերմնաբուծության եւ սերմարտադրության զարգացման նպատակով նախատեսվում է ներկրել աշնանացան ցորենի 420 տոննա սուպեր էլիտային եւ 20 տոննա էլիտային  սերմեր:

ԳՆ հասարակայնության հետ կապերի բաժնից հայտնում են, թե ՀՀ գյուղատնտեսության նախարարության «Սերմերի գործակալություն» ՊՈԱԿ-ի տնօրենը հանրապետության առաջատար փորձագետների հետ օգոստոսի 10-25-ը գտնվում էին  ՌԴ-ի Ստավրոպոլի երկրամասում, որպեսզի տեղում ստուգեն սերմացուի որակական բոլոր հատկանիշները: Ռուսաստանի Դաշնություն մեկնած անկախ փորձագետները տեղում իրականացրել են սուպեր էլիտային 8 եւ էլիտային 4 սորտերի զննում, ստուգել դրանց համապատասխանությունն ըստ  ՀՀ կառավարության ներկայացրած բոլոր չափորոշիչների՝ զտում, ախտահանում,  ակտերի եւ  հավաստագրերի առկայություն:

Հանձնաժողովն ընտրողաբար նաեւ կշռել է սերմացուի պարկերը, ճշտել պարկերի մաքուր քաշը: Օրվա օպերատիվ տվյալով` 320 տոննա  սերմացուն  բաշխվել է մարզերին, 100 տոննան արդեն Հայաստան է ներկրված, իսկ վերջին խմբաքանակը ճանապարհին է եւ մինչեւ սեպտեմբերի մեկը կբաժանվի գյուղացիական տնտեսություններին: