Ռումինացի նախկին բանտապետին ցեղասպանության մեղադրանք են ներկայացրել: Ռումինիայում ցեղասպանության մեղադրանքով գործեր չէին քննվել սկսած 1989թ.-ից, երբ դատապարտվել եւ մահապատժի էր ենթարկվել երկրի նախկին նախագահ Նիկոլայ Չաուշեսկուն: 

Ըստ քննության վարկածի՝ 88-ամյա Ալեքսանդր Վիշինեսկուն, որը 1956-1963թթ. ղեկավարել է Ռիմնիկու-Սերատ բանտը, պատասխանատու է բանտարկյալների մահվան համար: Մեղադրյալն արդեն ցուցմունքում նշել է, որ սոսկ հրամաններ է կատարել: Եթե Վիշինեսկուն մեղավոր ճանաչվի, նրան ցմահ բանտարկություն է սպառնում,  հայտնում է «lenta.ru»-ն:

Սկզբնապես Վիշինեսկուի գործով զբաղվում էր Ռումինիայում կոմունիստական հանցագործությունների հետաքննության ինստիտուտը, ինչպես նաեւ լրագրողները: Մամուլում նաեւ տեղեկություններ էին հրապարակվել, որ 1946թ. Վիշինեսկուն այն  դահիճներից մեկն է եղել, որոնք գնդակահարել էին դատապարտված ռումինացի ֆաշիստ բռնապետ Իոն Անտոնեսկուին:

Ռիմնիկու-Սերատ բանտում 1947թ. ռումինական վերնախավի բազմաթիվ ներկայացուցիչներ են նստած եղել:  1963թ. բանտը փակվել էր: