նախընտրելի դարձնել
Հայաստանի ոստիկանությունը մգեցված ապակիներով մեքենաների դեմ «ռեյդ» չի սկսել: NEWS.am-ի թղթակցի հետ զրույցում ճանապարհային ոստիկանության 1-ին սպայական գումարտակի հրամանատար, փոխգնդապետ Արսեն Արշակյանն հերքեց լրատվամիջոցներում տարածված նմանատիպ տեղեկությունները՝ նշելով, որ նման բան գոյություն չունի:
«Երբ ձեռք կբերվի այն սարքերը, որոնցով մենք կարող ենք չափել տրանսպորտային միջոցների ապակիների մգեցվածության աստիճանը, այդ ժամանակ ոստիկանությունը պաշտոնական կայքով կտեղեկացնի ազգաբնակչությանը կատարվելիք եւ կատարվող աշխատանքների մասին: Առայժմ նման բան գոյություն չունի»,- նշեց նա:
Արսեն Արշակյանը վարորդներին խորհուրդ է տալիս հետեւել ոստիկանության պաշտոնական կայքին եւ հավելում, որ ինչ-որ միջոցառում սկսելուց առաջ կտեղեկացնեն նախապես:
Նշենք, որ ըստ չափորոշիչի՝ մեքենաների դիմապակու մգեցվածությունը պետք է լինի 25 տոկոս, վարորդի եւ նրա կողքի նստած ուղեւորի ապակու մգեցվածությունը՝ 30 տոկոս, իսկ հետեւի ապակիների մգեցվածության վերաբերյալ որեւէ սահմանափակում չկա:
