նախընտրելի դարձնել
«Մոսկովսկի կոմսոմոլեցը» պատմել է 20 միլիարդ եվրո կանխիկ գումարի մասին, որը 2007թ. հասցրել էին «Շերեմետեւո» օդանավակայան, եւ այդ օրվանից դրանք ոչ ոք չէր տարել: Փողերը բերել էին գերմանական Ֆրանկֆուրտից, իսկ բեռի տեր է նշվում Իրանի քաղաքացի ոմն Ֆարզին Կորորիան Մոթլագը:
Գումարին կցված փաստաթղթում չի նշվում, որ օդանավով Մոսկվա փող է տեղափոխվել, միայն ասված է, որ «Շերեմետեւո» օդանավակայան է տեղ հասցվել 200 եվրոպալետ, սակայն բեռի տեսակը նշված չէ: Հոդվածի հեղինակ Եվա Մերկաչեւան Facebook-ում հայտնել է, որ ավելի ուշ տրված փաստաթուղթ կա, որտեղ նշված է, որ «յուրաքանչյուր պալլետ հարյուր միլիոն է»:
Ինչ-որ հրապարակման վկայակոչած հոդվածում ասվում է, որ Ֆարզին Կորորիան Մոթլագը խառն է եղել ԱՄԷ-ի Կենտրոնական բանկից 14 միլիարդ դոլար առեւանգելու գործին: «ՄԿ»-ն նաեւ ենթադրել է, որ 20 միլիարդ եվրոն կարող էր պատկանել Սադամ Հուսեյնին: Հաղորդվում է նաեւ, որ ոմն «չեկիստ» հոդվածի հեղինակին զգուշացրել է, որ այդ պատմությամբ զբաղվելը «վտանգավոր է», հայտնում է lenta.ru-ն:
2011թ. հունվարին The National-ը գրել էր, որ ոմն Ֆարզին Ալի (Farzeen Ali) ԱՄԷ-ում հեռակա կարգով տասնամյա ազատազրկման էր դատապարտվել` երկրի ԿԲ-ից գումար գողանալու փորձի համար, ընդ որում` խոսքը 20 միլիարդ եվրոյի մասին էր: Ըստ ոստիկանների` Ալին հետախուզման մեջ է, սակայն Ինտերպոլի բազայոմ նա չկա: ԱՄԷ-ի իրավաբանական ծառայությունն անվանել է Ալիի լրիվ անունը. Farzin Ali Karoryan Mutlaq:
Մինչդեռ «Շերեմետեւո» օդանավակայանը հերքել է այնտեղ 6 տարի 20 միլիարդ եվրոյով օդանավի գտնվելու մասին տեղեկությունը: «Դա անհեթեթություն է», - «Փրայմ» գործակալությանն ասել է օդանավակայանի ներկայացուցիչը:
