նախընտրելի դարձնել
Հավաքական անվտանգության պայմանագրի կազմակերպության (ՀԱՊԿ) ռազմատնտեսական համագործակցության միջպետական հանձնաժողովի 11-րդ նիստը տեղի կունենա հոկտեմբերի 3-ին` «Անի պլազա» հյուրանոցի «Անի» սրահում: Նիստի պաշտոնական բացմանը ողջույնի խոսքով հանդես կգան ՀԱՊԿ գլխավոր քարտուղար Նիկոլայ Բորդյուժան եւ ՀՀ ազգային անվտանգության խորհրդի քարտուղար Արթուր Բաղդասարյանը:
Էկոնոմիկայի նախարարության մամուլի ծառայությունից հայտնում են, թե նիստին մասնակցելու նպատակով Երեւան են ժամանել Ռուսաստանի, Բելառուսի, Ղազախստանի, Ղրղզստանի եւ Տաջիկստանի ՀԱՊԿ ռազմատնտեսական համագործակցության միջպետական հանձնաժողովի ազգային մասերի պատվիրակությունները:
Մինչ պլենար նիստը, հոկտեմբերի 1-ից 2-ը, տեղի կունենան ՀԱՊԿ ռազմատնտեսական համագործակցության միջպետական հանձնաժողովի Նախագահին առընթեր աշխատանքային խմբի նիստերը, որոնց ընթացքում կհամաձայնեցվեն եւ վերջնական տեսքի կբերվեն պլենար նիստին ներկայացվող փաստաթղթերը:
Պլենար նիստի ընթացքում կամփոփվեն նախորդ նիստի արձանագրությամբ ձեռք բերված պայմանավորվածությունների կատարման արդյունքները, կքննարկվեն ՀԱՊԿ ռազմատնտեսական համագործակցության շրջանակներում մշակված մի շարք նախագծերի, մասնավորապես` ՀԱՊԿ անդամ պետությունների մինչեւ 2015 թվականը ռազմատնտեսական համագործակցության ծրագրի, մի շարք համաձայնագրերի եւ այլ փաստաթղթերի նախագծերը:
Նիստի ավարտին (ժամը 12.00-ին) ՀԱՊԿ ռազմատնտեսական համագործակցության միջպետական հանձնաժողովի ազգային մասերի ղեկավարները կստորագրեն համապատասխան արձանագրություն, որտեղ կամրագրվեն նիստի ընթացքում ընդունված որոշումները: Ստորագրման արարողությունից անմիջապես հետո տեղի կունենա Նիկոլայ Բորդյուժայի եւ Արթուր Բաղդասարյանի մամուլի ասուլիսը:
Նիստի կազմակերպչական աշխատանքներն իրականացնում է ՀԱՊԿ ռազմատնտեսական համագործակցության միջպետական հանձնաժողովի հայկական կողմը, որի նախագահն է ՀՀ էկոնոմիկայի նախարարի տեղակալ Գառնիկ Բադալյանը:
