Ամերիկացի գիտնականները պարզել են, որ մարդիկ առավել հաճախ ծխելը ցանկանում են թողնել երկուշաբթի կամ չորեքշաբթի օրերին: Նման եզրակացության մասնագետները հանգել են  Google-ի  2008-2012թթ. անգլերեն, ֆրանսերեն, պորտուգալերեն, չինարեն, իսպաներեն ու ռուսերեն որոնման հարցումները ուսումնասիրելուց հետո: Ըստ գիտնականների՝ այս տվյալները կօգնեն շտկումներ կատարել ծխելու դեմ պայքարի ծրագրում եւ այն առավել արդյունավետ դարձնել, հայտնում է Teleport2001.ru-ն՝ վկայակոչելով  JAMA-ն:

«Ինչպես թողնել ծխելը» հարցումը հանգամանորեն ուսումնասիրելուց հետո գիտնականները եզրահանգում են կատարել. «Որքան մոտ է շաբաթվա սկիզբը, այնքան մարդիկ ավելի շատ են ցանկանում անցում կատարել առողջ ապրելակերպի:

Փոփոխությունների ձգտումն ամենասաստիկը երկուշաբթի օրերին է, այդ օրերին նման բովանդակությամբ հարցումները միջինը 25%-ով ավելի են:  Թե հատկապես ինչով է բացատրվում այս օրինաչափությունը, դժվար է ասել: Հավանաբար ենթագիտակցաբար շատերը երկուշաբթին ոչ միայն շաբաթվա սկիզբ են համարում, այլեւ  ինչ-որ նոր բան սկսելու կամ ծրագրերի իրականացման  օր: