Աշխատանքային այցով Ռուսաստանի մայրաքաղաք Մոսկվայում գտնվող ՀՀ կրթության եւ գիտության նախարար Արմեն Աշոտյանը հանդիպում է ունեցել «Ռոսսոտրուդնիչեստվո» դաշնային գործակալության ղեկավար Կ. Կոսաչեւի հետ եւ քննարկել երկու երկրների մեջ հումանիտար համագործակցությունը:

Շնորհակալություն հայտնելով ջերմ ընդունելության համար՝ Ա. Աշոտյանը նշել է, որ երկու երկրների միջեւ հումանիտար համագործակցությունը գտնվում է երկու պետությունների նախագահների ուշադրության կենտրոնում, ինչի վկայությունն է նրանց վերջին հանդիպման ընթացքում անդրադարձը կրթության եւ գիտության հարցերին:

Հանդիպման ընթացքում քննարկել են  երկկողմ հետաքրքրություն ներկայացնող մի շարք հարցեր, մասնավորապես, Հայաստանում ռուսերենի, Ռուսաստանի հայաշատ քաղաքների հանրակրթական դպրոցներում հայերենի դասավանդման, դասագրքերի, ուսանողների փոխանակման կրթաթոշակային ծրագրերի հետ կապված հարցեր: Կողմերը պատրաստակամություն  են հայտնել  նոր թափ հաղորդել հայ-ռուսական կրթական օրակարգում գտնվող բոլոր հարցերին, ինչպես նաեւ այդ օրակարգը համալրել նոր նախաձեռնություններով:

Հանդիպումից հետո Ա. Աշոտյանը  «Ռուսաստանի ձայն» ռադիոընկերությունում հյուրընկալվել է Կ. Կոսաչեւի հեղինակային հաղորդմանը: