Մեքսիկայի Իդալգո նահանգում շարունակվում է աճել խոլերայով վարակվածների թիվը` չնայած իրականացվող սանիտարահամաճարակաբանական  կանխարգելող միջոցառումներին: Առողջապահության նախարարության ներկայացուցիչները հայտարարել են, որ  Իդալգոյում խոլերայով վարակվածների թիվը հասել է 160-ի, հաղորդում է ԻՏԱՌ-ՏԱՍՍ-ը: 

Մեքսիկայի սանիտարական ծառայություններն մեծածավալ աշխատանքներ են իրականացնում Իդալգոյի 84 համայնքներում: Այժմ հատուկ ուշադրություն է դարձվում Ուեհութլա շրջանին, որտեղ գրանցվել է խոլերայով վարակվածների ամենամեծ թիվը:

Մեքսիկայում խոլերայի վարակի առաջին դեպքը գրանցվել էր  սեպտեմբերին: Այդ ժամանակից ի վեր երկրում վարակվածների թիվը հասել է 160-ի: Բացի Իդալգոյից` վտանգավոր հիվանդությամբ վարակվելու դեպքեր են գրանցվել նաեւ մայրաքաղաքի դաշնային շրջանում, Վերակրուս, Մեխիկո եւ Սան Լուիս Պոտոսի նահանգների տարածքներում: