նախընտրելի դարձնել
Կոտայքի մարզպետ Կովալենկո Շահգալդյանը քննարկման կդնի Աբովյանի առեւտրականների պահանջը: Այս մասին NEWS.am-ի թղթակցի հետ զրույցում ասաց Կոտայքի մարզպետ Կովալենկո Շահգալդյանը:
Նա նշեց, որ խնդիրը, թեեւ իրենց լիազորությունների շրջանակում չէ, բայց կքննարկեն, կտեսնեն, թե առեւտրականների պահանջները որքանով է օրենքի շրջանակում: «Եթե պահանջը օրինական լինի, կփորձենք օգնել»,- ասաց նա: Մարզպետը նաեւ տեղեկացրեց, որ իր Աբովյանի օգնականը երկուշաբթի հանդիպելու է առեւտրականների հետ, որպեսզի միասին քննարկեն խնդիրը եւ տեսնեն, թ ե ինչ կարող են անել:
Ավելի վաղ տեղեկացրել էինք, որ Աբովյան քաղաքում նոյեմբերի 30-ին բազմաթիվ առեւտրականներ ցանկացել են հանդիպել Աբովյանի հարկային տեսչության պետ Վարդան Սահակյանին, սակայն նա չի ընդունել բողոքի դուրս եկած առեւտրականներին: Այս մասին NEWS.am-ին փոխանցել էին առեւտրականները: Նրանք դժգոհում էին, որ հարկային տեսչությունը իրենց տեռորի է ենթարկում եւ իրենք չեն կարողանում արհեստական հարկերի տակից դուրս գալ: Իսկ, երբ առեւտրականները ցանկացել են ներս մտնել աշխատասենյակ, Վարդան Սահակյանը դիմել է ոստիկանների օգնությանը եւ առեւտրականներին դուրս են հանել աշխատասենյակից: Առեւտրականները փոխանցեցել էին նաեւ, որ դրանով ոչինչ չի ավարտվում, քանի որ իրենք դեռ նոր են սկսել իրենց պայքարը եւ թույլ չեն տալու, որ հարկային չհիմնավորված քաղաքականությամբ ծակեն իրենց գրպանները: «Բոլորը ռեկետ են դարձել: Այսօր այս ժողովուրդը ռեկետի զոհ է դարձել կամ պետք է մեր իրավունքներին տեր կանգնենք կամ վերջում մենք էլ համալրենք սովածների շարքերը»,- նշել էին առեւտրականները եւ ավելացրել, որ փորձելու են հանդիպել նաեւ ԲՀԿ նախագահ Գագիկ Ծառուկյանին:
