Վրաստանում, դեկտեմբերի 21-ին, օծվել է Մառնեուլի շրջանի Շահումյան ավանի Սուրբ Աստվածածին եկեղեցին:

Վիրահայոց թեմի մամլո դիվանից հայտնում են, որ օծման արարողությանը ներկա են եղել Վրաստանի նախագահի խորհրդական Վան Բայբուրթյանը, Վրաստանի նկարիչների միության նախագահ Մերուժան Շահումյանը, Գարի Դավթյան տիկնիկային մշակույթի տան  տնօրեն  Ժաննա Դավթյանը, բարերար Միքայել Արաբաջյանը, գործարար Ռաֆայել Աղաջանյանը, Շահումյանի  գյուղական խորհրդի պատգամավոր Էդուարդ Գասպարյանը, տեղի  հանրային դպրոցի տնօրեն  Արտյուշ Ուրումյանը, Կարմիր գյուղի դպրոցի տնօրեն Հմայակ Սայադյանը   եւ ուրիշներ:

Շահումյանը  Վրաստանի Մառնեուլի շրջանի քաղաքատիպ  հայաբնակ  ավան է: Բնակիչների նախնիները  գաղթել են  Արցախից եւ Վրաստանի այլ վայրերից: Գյուղը  հիմնադրելու ժամանակ, 1715-20-ական թվականներին ժողովրդի միջոցներով կառուցվել է  Սուրբ Աստվածածին անունով եկեղեցին: 1848 թվականին այն  ենթարկվել է  հիմնական վերանորոգման:

Տասնամյակներ  անց եկեղեցին կրկին հայտվել է ավերված եւ թշվառ վիճակում: Առաջացավ եկեղեցու հիմնական վերանորոգման  անհրաժեշտություն: Վիրահայոց թեմը ոչ միայն նախաձեռնել եւ կազմակերպել է եկեղեցու  վերանորոգչական աշխատանքները, այլեւ ամբողջացրել եւ հասցրել ավարտին:  Եկեղեցու օծումից հետո  մատուցվել է անդրանիկ Սուրբ Պատարագը: Պատարագիչն էր  Տեր Հուսիկ քահանա Հարությունյանը: Սբ. Պատարագն ընթացել է Թբիլիսիի Սբ. Գեւորգ եկեղեցու երգչախմբի անդամների կողմից շարականների կատարումների ներքո:

Հավարտ Սբ. Պատարագի  ներկա հասարակությանը  օրհնության եւ գնահատանքի   խոսքով  դիմեց  Թեմակալ առաջնորդը: Սրբազան Հայրը շնորհավորել է  շահումյանցիներին եկեղեցու  բացման կապակցությամբ,  գնահատանքի  խոսքեր ուղղեց  բարերարներ Հրաչ եւ Վիտալի Մանասյաններին,  Միքայել  Արաբաջյանին, Վիրահայոց թեմի  վարչա-տնտեսական բաժնի պատասխանատու Կարեն Երիցյանին, Տեր Հուսիկ քահանա Հարությունյանին, որոնց  ջանքերով  վերանորոգվեց այս եկեղեցին ու նվիրվեց ավանի հայ ազգաբնակչությանը:

Շահումյան ավանում, բացի հայերից բնակվում են նաեւ  ադրբեջանցիներ,  վրացիներ, ռուսներ, հույներ: Սեփական աղոթատեղի ունենալը հայերի  վաղեմի երազանքն էր, որը վերջապես իրականություն դարձավ Սուրբ Աստվածածին եկեղեցու բացմամբ:  Շահումյանցին ունեցավ առ Աստված աղոթելու,   մկրտվելու, պսակ անելու, Հայ Առաքելական  Սուրբ Եկեղեցու  կանոններով ապրելու հնարավորություն: