Կարեն Դեմիրճյանի անվան մարզահամերգային համալիրի աճուրդն անօրինական է ՀՀ մի շարք օրենքների խախտումներով: Այս մասին հայտնում է համալիրի հասարակության հետ կապերի եւ լրատվության պատասխանատու Լիլիա Ադունցը:

«Համաձայն ՀՀ «ԴԱՀԿ ծառայության» եւ «Վարչատարածքային բաժանման մասին» օրենքների ԴԱՀԿ ծառայությունը կազմված է կենտրոնական եւ տարածքային բաժիններից, որոնց կազմում գործում են բաժանմունքներ: Քանի որ Երեւանն ունի մարզի կարգավիճակ, հետեւաբար պետք է լինի ԴԱՀԿ-ի Երեւան քաղաքի բաժին եւ համապատասխանաբար, վեց վարչական շրջանների բաժանմունք:

ՀՀ «Իրավական ակտերի մասին» օրենքի համաձայն չի կարող գոյություն ունենալ ԴԱՀԿ ծառայության Երեւանի քաղաքի Կենտրոն եւ Նորք Մարաշի բաժին, հետեւաբար, նրա կողմից աճուրդի վերաբերյալ որոշումն առ ոչինչ է՝ կայացման պահից:

Առ ոչինչ իրավական ակտն իրավաբանական ուժ չունի եւ ենթակա չէ կատարման, որը չի կարող առաջացնել որեւէ պատասխանատվություն այն անձի համար, ում հասցեագրված է: Վերհիշյալ հիմքերով ընկերությունը դիմել է Վարչական դատարան»:

Նշենք, որ մարզահամերգային համալիրն այսօր նորից հանվելէ  աճուրդի արդեն տասը տոկոս զեղչով՝ 17 մլրդ դրամ: