նախընտրելի դարձնել
Արցախի Հանրապետության վարչապետ Արա Հարությունյանն այսօր՝ հունիսի 11-ին ընդունել է ԼՂՀ Ազգային ժողովի «Դաշնակցություն» խմբակցության անդամներին՝ քննարկելու 2013թ. բյուջեի կատարողականին եւ սոցիալ-տնտեսական հիմնախնդիրներին առնչվող որոշ հարցեր:
ԼՂՀ կառավարության տեղեկատվության եւ հասարակայնության հետ կապերի բաժնից հայտնում են, թե վարչապետը ողջունել է իշխանության գործադիր եւ օրենսդիր ճյուղերի միջեւ պարբերական շփումները՝ աշխատանքների արդյունավետ կազմակերպման եւ հիմնախնդիրների վերհանման համատեքստում: Կառավարության ղեկավարը ներկայացրել է սոցիալ-տնտեսական եւ կրթական որոշ ծրագրերի իրականացման ընթացքը:
Ա. Հարությունյանը կարեւորել է խորհրդարանի դերը պետբյուջեի կատարողականի արդյունավետության բարձրացման գործում՝ ակնկալելով կառուցողական առաջարկներ այդ ուղղությամբ: Վարչապետի խոսքով՝ հանրապետության բյուջեն ուղղված է գլխավորապես սոցիալ-տնտեսական իրավիճակի բարելավմանը, եւ դրա պլանավորումն ու իրագործումը պետք է ելնեն այդ տրամաբանությունից:
Քննարկվել են նաեւ կրթական համակարգին եւ կադրերի պատրաստմանը վերաբերող հարցեր: Կառավարության ղեկավարը շեշտադրել է տնտեսությունում որակյալ կադրերի սղության խնդիրը եւ կարեւորել իշխանության բոլոր ճյուղերի համատեղ աշխատանքի անհրաժեշտությունը նշված ոլորտում հաջողություններ գրանցելու համար: Այդ համատեքստում անդրադարձ է կատարվել Շուշիի արհեստագործական ուսումնարանի նշանակությանը եւ նախատեսվող աշխատանքներին, որոնք սկսելու են սույն թվականի սեպտեմբերին: Կառավարության ղեկավարը համոզմունք է հայտնել, որ ֆրանսիական մոդելով աշխատող ուսումնարանն ի վիճակի է լինելու պատրաստել շինարարության բնագավառի որակյալ մասնագետներ:
Հանդիպմանը մասնակցում էր նաեւ Արցախի Հանրապետության փոխվարչապետ Արթուր Աղաբեկյանը:
