նախընտրելի դարձնելՀայ ժողովրդի նկատմամբ շուրջ 2,5 տարի կիրառվող իշխանական տեռորը վերջին օրերին նոր երանգներ եւ որակներ է ստացել:
Իշխանությունը բռնազավթած օլիգարխիկ կլանը չհագենալով մարտի 1-ի սպանդով, քաղաքական տեռորով , ընդդիմադիր գործիչների ապօրինի ձերբակալություններով եւ առ այսօր անազատության մեջ պահելով` կարծես նոր արյան ծարավ է զգում: Այդ մասին ասված է Սոցիալ-դեմոկրատ հնչակյան կուսակցության տարածած հայտարարության մեջ:
«Արտաքին մարտահրավերներին դիմակայելու անընդունակ եւ քաղաքական իմաստությունից զուրկ իշխանությունը ` կանխազգալով իր մոտալուտ վախճանը ` ընդդիմության հետ երկխոսելու եւ ներքաղաքական լարվածությունը թուլացնելու փոխարեն առավել դաժան գործողությունների է մղում ոստիկանությանը` ավելի խորացնելով հասարակության եւ իրավապահ մարմինների միջեւ գոյություն ունեցող անջրպետը»,- նշել է ՍԴՀԿ ատենապետ Լյուդմիլա Սարգսյանը եւ հավելել. «Ոստիկանության ապօրինի գործողությունները, որոնք ուղեկցվում են դաժան բռնություններով , ծեծով եւ մասսայական ձերբակալություններով `զուրկ լինելով օրինական հիմքերից , վերջնականապես բարոյազրկում են առանց այդ էլ ապականված ոստիկանական համակարգը եւ լրիվ կախվածության մեջ դնում իշխանությունների քմահաճություններից»:
Ըստ ՍԴՀԿ-ի՝ ընդդիմադիր երիտասարդների մուտքի արգելափակումը Ազատության հրապարակ, իրավապահների կողմից բռնի ուժի միջոցով ոչ զանգվածային բողոքի ակցիաների անցկացման կասեցումը , այնուհետեւ լրագրողների եւ ակտիվիստների ապօրինի ձերբակալությունները` ուղիղ դրա վկայությունն են:
ՍԴՀԿ կենտրոնական վարչությունը պահանջել է նաեւ՝ անհապաղ ազատ արձակել բոլոր քաղաքական բանտարկյալներին, վերջ տալ ոստիկանական տեռորին եւ ամենաթողությանը, Ազատության հրապարակը ազատել «իրավապահների» անպատեհ ներկայությունից:
