Beeline ընկերությունը մասնակցում է ARMENQA նախագծի երկօրյա աշխատաժողովին, որը նվիրված է Հայաստանում բարձրագույն կրթության որակավորումների ազգային շրջանակի հիմնախնդիրներին:

Երկօրյա համաժողովի ընթացքում կքննարկվի բարձրագույն կրթության որակավորումների ազգային շրջանակի հայաստանյան տարբերակը, որը նպատակ ունի հստակեցնել որակավորման բարձրագույն կրթության 4 մակարդակները (բակալավր, մագիստրոս, գիտությունների թեկնածու, գիտությունների դոկտոր), ինչպես նաեւ դրանց ներքո անհրաժեշտ հմտությունները եւ կարողություններն առավելագույնս մոտեցնել աշխատաշուկայի պահանջներին:

«Այսօր, առավել քան երբեւէ, անգնահատելի է կրթության դերը ժամանակակից աշխարհում: Հանդիսանալով Հայաստանի խոշորագույն գործատուներից  մեկը՝  Beeline-ը ողջունում է այնպիսի միջոցառումների անցկացումը, որոնք  ուղղված են մարդկային կապիտալի որակի բարձրացմանը եւ աշխատաշուկայի պահանջների սահմանմանը 21-րդ դարի մասնագետների նկատմամբ: Նման նախաձեռնությունները վկայում են, որ Հայաստանում գործարար միջավայրն իր զարգացման առումով թեւակոխել է որակապես նոր փուլ»,- «ԲՈՒՀ-ից դեպի Beeline. աշխատանք եւ հնարավորություններ» պլենար զեկույցում նշել է Հայաստանում Beeline-ի Մարդկային ռեսուրսների կառավարման եւ կազմակերպական զարգացման տնօրեն Մարինե Գալստյանը:

«Հաշվի առնելով, որ ՀՀ-ում մի քանի ոլորտներ համարվում են գերակա, որոնց զարգացումը կապահովի տնտեսական զգալի աճ, ապա բնականաբար պետք է խոսենք նաեւ այդ ոլորտների համար մասնագետների կարողությունների մասին ըստ 21-րդ դարի պահանջների: Այդպիսի ոլորտներից է նաեւ ՏՀՏ ոլորտն, որի զարգացումը կարեւոր է նաեւ տնտեսության մնացած ճյուղերի զարգացման եւ բիզնես հաղորդակցման, տվյալների բազաների ձեւավորման եւ արտահանման խթանման տեսանկյունից: Այս համատեքստում արժեքավոր է Beeline-ի փորձը եւ տեսակետները նշված բնագավառներում»,- պլենար զեկուցում նշեց Հայաստանի գործատուների հանրապետական միության նախագահ Գագիկ Մակարյանը: