նախընտրելի դարձնել
Աշնանը՝ ոռոգման տարեշրջանի ավարտից հետո, նախատեսվում է Սեւանա լճում ջրի մակարդակի վերականգնում: Այս մասին օգոստոսի 11-ին՝ պաշտոնավարման 100 օրվա լրանալու կապակցությամբ Խոսրովի արգելոցում կազմակերպված մամուլի ասուլիսում լրագրողներին հայտնել է բնապահպանության նախարար Արամայիս Գրիգորյանը:
Ջրի նվազեցման պատճառներից մեկը, ըստ նախարարի, չորային տարին է եւ ոռոգման նպատակներով ջրառի ավելացումը:
2013 թ. օգոստոսի համեմատությամբ` լճում ջրի մակարդակը նվազել է 9 սմ-ով: Հիշեցնենք, որ հուլիսի սկզբին, Հայաստանի ջրային տնտեսության պետական կոմիտեի ղեկավար Անդրանիկ Անդրեասյանի հայտարարության համաձայն, Սեւանում ջրի մակարդակը 1900 մ 48 սմ էր:
Բնապահպանության նախարարը հիշեցրել է, որ մինչեւ 2030 թ. Սեւանի ջրի մակարդակը պետք է հասցնել 1903,5 մ-ի: «Ցավոք, չորային տարեշրջանի պատճառով խորհրդարանն ստիպված էր հաստատել օրենքի փոփոխությունները, ըստ որոնց` 2014 թ. Սեւանից առավելագույն ջրառը ավելացվել էր մինչեւ 270 միլիոն խմ-ի», - նշել է նա: Ներկայումս այդ ծավալից արդեն օգտագործվել է մոտավորապես 130 միլիոն խմ-ն: «Սակայն հուսով եմ, որ երբ ոռոգման տարեշրջանն ավարտվի, մենք արագ կհամալրենք, եւ մակարդակի բարձրացումը կշարունակվի: Ընդհանուր առմամբ, մենք արդեն 1 մետրով գերազանցում ենք լճի ջրի մակարդակը բարձրացնելու գրաֆիկը», - վստահեցրել է նախարարը:
Նշենք, որ ջրառի ավելացման վերաբերյալ որոշումը կայացվել էր հունիսի վերջին` շտապ ընթացակարգով եւ առանց փորձագետների ու ՀԿ-ների հետ խորհրդակցության:
