նախընտրելի դարձնելՄԱԿ-ի 69-րդ Գլխավոր ասամբլեայում Եգիպտոսի պատվիրակությունը չեղյալ է հայտարարել թուրք գործընկերների հետ նախատեսված երկկողմ հանդիպումները: Պատճառը Թուրքիայի նախագահ Ռեջեփ Թայիփ Էրդողանի ելույթն է եղել, որը խիստ քննադատաբար էր արտահայտվել իր եգիպտացի գործընկեր Աբդել Ֆաթահ աս Սիսիի հասցեին, հայտնում են տեղական լրատվամիջոցները:
Մասնավորապես, Էրդողանը միջազգային հանրությանը մեղադրել էր Եգիպտոսում ռազմական հեղաշրջմամբ իշխանության լեգիտիմացնելու համար: «Ես դեմ եմ նրա (աս Սիսիի) ներկայությանը համաշխարհային առաջնորդների շարքում: Դրանով ՄԱԿ-ը օրինականացնում է նրան, ով պաշտոնանկ է արել ժողովրդի կամքով ընտրված նախագահին (Մուհամեդ Մուրսիին), - ընդգծել է նա: - Ինչո՞ւ է լռում աշխարհը ժողովրդավարության դեմ ուղղված հեղաշրջման մասին: Մենք պետք է հարգենք ժողովրդի ընտրությունը, որը նա կատարել էր քվեարկության միջոցով: Եթե ցանկանում ենք զորակցել հեղափոխություններին, էլ ինչի՞ համար է ՄԱԿ-ը»,- փոխանցում է ԻՏԱՌ-ՏԱՍՍ-ը:
Եգիպտոսի պաշտոնատար անձինք արդեն իրենց վրդովմունքն են հայտնել այս հայտարարությունների առթիվ: ԱԳՆ-ի պաշտոնական ներկայացուցիչ Բադր Աբդել Աթին հայտնել է, որ այդ խոսքերը ներծծված էին ստով եւ հորինվածքներով:
«Թուրքիայի նախագահի խոսքում զարմանալի ոչինչ չկար, եթե հաշվի առնենք, որ նա ձգտում է քաոս սերմանել Մերձավոր Արեւելքում՝ սատարելով ահաբեկչական խմբավորումներին եւ կազմակերպություններին՝ տարածաշրջանի ժողովուրդների շահերին վնասելու նպատակով, հանուն անձնական ձգտումների եւ անցյալի պատրանքների», - ասել է դիվանագետը:
Ավելի վաղ թուրքական կողմն ինքն էր ՄԱԿ-ի ԳԱ-ի շրջանակում երկու երկրների արտգործնախարարների հանդիպում խնդրել: Սակայն, ըստ Աբդել Աթիի, Էրդողանի ելույթից հետո ոչ մի երկկողմ բանակցություն էլ չի կայանա:
Երկու երկրների հարաբերությունները լրջորեն վատացել էին նախորդ տարվա հուլիսի 3-ին իսլամիստների կողմից նախագահ Մուրսիին պաշտոնանկ անելուց հետո:
