նախընտրելի դարձնել«Իսլամական պետության» գրոհայինները եզդի կանանց թնդանոթի մսի տեղ են օգտագործում, սեպտեմբերի 26-ի մամուլի ասուլիսում հայտարարել է «Սինջար» եզդիների ազգային միավորման նախագահ Բորիս Մուրազին:
Ըստ նրա՝ ահաբեկիչները գերեվարել են 5 հազար կանանց, երեխաների եւ ծերերի: Մուրազին միաժամանակ նշել է, որ եզդիների ջոկատները վերջին օրերին զգալի հաջողությունների են հասել իսլամիստների կողմից գրավված եզդիաբնակ Սինջար շրջանում:
«Սեպտեմբերի 21-ին ավելի քան 150 ահաբեկիչ է վերացվել», - նշել է նա:
Հարցին՝ ով է զենք մատակարարում եզդիների ջոկատներին, Մուրազին պատասխանել է, որ նախապես նրանց օգնում էին սիրիացի քրդերը, որոշակի օգնություն է ցուցաբերել իրաքյան կառավարությունը, սակայն մեծ մասամբ եզդիները օգտագործում են ահաբեկիչներից խլած զենքերը:
Մամուլի ասուլիսի մեկ այլ բանախոս, «Եզդիների ազգային կոմիտե» ՀԿ-ի ներկայացուցիչ Սաշիկ Սուլթանյանն ընդգծել է, որ այս պահին եզդիների առաջ դրված խնդիրն է վերադառնալ Սինջար եւ ինքնավարություն ստեղծել: Այս տեսանկյունից կարեւոր է, որպեսզի եզդիները հնարավորության դեպքում չլքեն Իրաքի տարածքը եւ չցրվեն աշխարհով մեկ:
«Ինչ վերաբերում է զոհերի թվին, առայսօր հստակ տվյալներ չկան: Հաշվարկը դժվարանում է նաեւ նրանով, որ տարիներ շարունակ այնտեղ բնակվող եզդիների թիվը կառավարությունը սխալ է ներկայացրել», - եզրակացրել է Մուրազին:
Հիշեցնենք, Իրաքի եզդիաբնակ տարածքները իսլամիստների կողմից գրավվելուց հետո հազարավոր մարդիկ փախստական են դարձել՝ ապաստան որոնելով հարեւան երկրներում:
