նախընտրելի դարձնելՎրաստանի լրագրողների անկախ ասոցիացիայի (IAGJ) նախագահ Զվիադ Պոչխուան հավաստում է, որ իրեն մերժել են Ռուսաստան մուտք գործելու թույլտվություն տրամադրել, որտեղ նա պատրասվում էր մասնակցել սեպտեմբերին Դագոմիսում կայանալիք միջոցառմանը, որը կազմակերպվում է Ռուսաստանի ժուռնալիստների միության կողմից՝ Լրագրողների միջազգային ֆեդերացիայի հովանու ներքո։ Ըստ նրա, Ռուսաստանի ԱԳՆ-ի բացասական որոշման մասին ինքն իմացել է օգոստոսի 11-ին։
Ըստ Պոչխուայի, կայանալիք հանդիպմանը նախատեսվում է քննարկել Ռուսաստանում լրագրողների վրա հարձակման փաստերը։ Նրա կարծիքով, լրագրողների անվտանգության տեսանկյունից հատկապես տագնապալի իրավիճակ է ստեղծվել Աբխազիայի ու Հարավային Օսիայի տարածքում, ուր արևմտյան լրագրողների մուտքը բարդանում է Ռուսաստանի պաշտպանության նախարարության ու ԱԳՆ-ի ներկայացուցիչների գործողությունների պատճառով, իսկ վրացի լրագրողներինը՝ ընդհանրապես անհնար է։
«Երկրների լարված քաղաքական հարաբերությունները չպետք է ազդեն լրագրողների գործունեության վրա»,- հայտարարել է ասոցիացիայի նախագահը։ Նա հայտնել է նաև, որ Վրաստանի լրագրողների անկախ ասոցիացիան դիմել է Լրագրողների միջազգային ֆեդերացիայի անդամ-կազմակերպություններին, ինչպես նաև ռուսաստանցի լրագրողներին՝ Դագոմիսում կայանալիք հանդիպմանը Ռուսաստանի ԱԳՆ որոշումը բողոքարկելու կոչով։
