նախընտրելի դարձնելԱՄՆ պետքարտողար Հիլլարի Քլինթոնի այցից հետո թուրքական լրատվամիջոցները սկսել են կրկին շահարկել հայ-թուրքական սահմանի բացման խնդիրը։
Այս անգամ էլ Թուրքական Radikal-ի լրագրող Մուրադ Յեթքինը իր հրապարակման մեջ գրել է, թե սեպտեմբերի 11-17-ը Հայաստանում ՆԱՏՕ-ի հետ համատեղ կազմակերպվելիք «Արմենիա 2010» զորավարժություններին մասնակից թուրքական կողմը պատրաստություն է տեսնում թուրքական տեխնիկայի մասնակցությունը ապահովելու համար ժամանակավորապես բացել հայ-թուրքական սահմանը։
Թուրքական պարբերականը նշում է, թե իբր ըստ Թուրքիայի դիվանագիտական աղբյուրների՝ սահմանի բացումը չի ունենալու պաշտոնական բնույթ։
Նշենք, որ Հայաստանի կառավարության մամուլի ծառայությունից NEWS.am-ին հայտնում էին, որ գործադիրը հուլիսի 1-ին կայացած նիստում որոշել է ՆԱՏՕ-ի «Գործընկերություն հանուն խաղաղության» ծրագրով 2010թ. սեպտեմբերի 11-17-ը Կոտայքի մարզում, Հայաստանի արտակարգ իրավիճակների նախարարության փրկարար ծառայության «Լուսակերտ» ուսումնական կենտրոնում եւ Արզնի քաղաքի շրջակայքում «Արմենիա 2010» փրկարարական դաշտային վարժանք անցկացնել։
