Սահմանին ժամանակ առ ժամանակ իրավիճակի սրացում է դիտվում: Այս մասին հունվարի  28-ին՝ Բանակի օրը, լրագրողների հետ զրույցում հայտարարել է ԼՂՀ պաշտպանության նախարար Մովսես Հակոբյանը: Նախարարը վստահեցրել է, որ հայկական բանակի ոգին շատ բարձր է: «Թշնամին միշտ  ինչ-որ դժվարությունների կամ մեր երկրի ներքին ցնցումների ժամանակ մտածում է, որ կարող է հաջողությունների հասնել: Սակայն վստահ եմ, որ այդ դժվարությունները հաղթահարելի են մեր ժողովրդի համար: Պատերազմը որպես այդպիսին ավարտված չէ, քանի որ խաղաղության համաձայնագիր չի ստորագրվել», - ասել է Հակոբյանը: Նա հավելել է, որ բանակը ստեղծվել է հենց նրա համար, որպեսզի կարողանան  դիմակայել հակառակորդի ոտնձգություններին եւ  համարժեք պատասխան տալ: