Վայոց Ձորի մարզի Ազատեկ համայնքում «Հայկական միրգ» ծրագրի շրջանակում հիմնվել են շուրջ 20 հեկտար բալենու, սալորենու, կեռասենու, նեկտարինի եւ ընկուզենու այգիներ: Ծրագրի հրավերով Հայաստան է ժամանել նաեւ ֆրանսիացի մասնագետ, ով գյուղացիներին ներկայացրել է ընկուզենու մշակության տեխնոլոգիաների իրենց փորձը:
Գյունախարարությունից հայտնում են, որ գյուղ այցելած ՀՀ գյուղատնտեսության նախարար Սերգո Կարապետյանը նշել է, որ ծրագիրը բավականաչափ շահավետ եւ հատկապես արդյունավետ է փոքր գյուղացիական տնտեսությունների համար: Այն հնարավորություն է ընձեռում 12 տարի ժամկետով վարձակալության հանձնել իրենց պատկանող հողատարածքները, որտեղ բացառապես ծրագրի միջոցներով բարձրարժեք սորտի ծառատեսակներ են տնկվում, եւ արդյունքում ստացված շահույթի 25 տոկոսը հետ է վերադարձվում հողատարածքի սեփականատիրոջը:
Բացի այդ, գյուղացիներն իրենք են աշխատում այդ նոր հիմնված այգիներում, որի դիմաց նույնպես վարձատրվում են: Իր կողմից կատարված ներդրումները հետ բերելուց հետո վարձակալող ընկերությունը պարտավորվում է գյուղացուն հետ վերադարձնել բերքատու այգին:
Գյուղացիների հետ զրույցների ընթացքում նախարարը հորդորել է նրանց միավորվել եւ կոոպերատիվներ ստեղծել, ինչը կօգնի խնդիրներին համատեղ ջանքերով առավել հեշտ եւ արդյունավետ լուծումներ տալ:





























