Ոստիկանությունն արձագանքել է ՀՀ ոստիկանության ՁՊՎ-ներում հասարակական դիտորդական խմբի հայտարարությանը՝ նշելով, որ դա ոստիկանության աշխատանքի վրա ստվեր գցելու փորձ է:
Ոստիկանության տարածած պարզաբանման մեջ նշվում է.
«ՀՀ ոստիկանության համակարգում գործող ձերբակալվածներին պահելու վայրերում վերահսկողություն իրականացնող հասարակական դիտորդների խմբի կայքէջում մայիսի 13-ին զետեղված «ՀՀ ոստիկանության խոչընդոտները Դիտորդական խմբի աշխատանքներին հասել է իր գագաթնակետին» հրապարակումը հերթական փորձն է փաստերը խեղաթյուրված ներկայացնելու եւ ստվեր գցելու ՀՀ ոստիկանության բաց ու թափանցիկ աշխատանքների վրա:
Ոստիկանությունը բազմիցս հորդորել է դիտորդների խմբի անդամներին, որ իրենց գործառույթներն իրականացնելիս ղեկավարվեն ՀՀ ոստիկանության պետի 14.01.2005 թ. «ՀՀ ոստիկանության համակարգի ձերբակալված անձանց պահելու վայրերում հասարակական դիտորդների խմբի գործունեության կարգը հաստատելու մասին» թիվ 1-Ն հրամանի պահանջներով, սակայն խումբը ոչ միայն չի ընդունում այն, այլ փորձում է հրավիրված ասուլիսների եւ իրենց կայքում զետեղված հրապարակումների միջոցով խեղաթյուրել ոստիկանության կողմից ներկայացված օրենքից բխող պահանջները` այն դիտելով որպես իրենց գործունեության նկատմամբ խոչընդոտում: Մասնավորապես.
1. Համաձայն նշված հրամանի 12-րդ կետի` խմբին առաջադրված խնդիրները լուծելու նպատակով խմբի անդամներն իրավունք ունեն անարգել այցելել ՁՊՎ-ներ, հանդիպել ՁՊՎ-ում պահվող անձանց, ծանոթանալ ՁՊՎ-ների գործունեությունը կանոնակարգող ներքին իրավական ակտերին, իսկ ՁՊՎ-ում պահվող անձանց համաձայնությամբ՝ նաեւ նրանց անձնական գործին եւ գրագրությանը: Մինչդեռ դիտորդների խումբն առանց ձերբակալվածների համաձայնության՝ ՁՊՎ վարչակազմից պահանջում է նրանց անձնական գործերն ու գրագրությունները, ինչը հակասում է ՀՀ սահմանադրության, «Անհատական տվյալների մասին» ՀՀ օրենքի, ինչպես նաեւ վերը նշված հրամանի պահանջներին եւ դրանց չտրամադրումը դիտում որպես իրենց գործունեության խոչընդոտում:
2. Հրամանի 9-րդ կետի «ե» ենթակետի համաձայն` խմբի անդամ չի կարող լինել այն անձը, ով աշխատում է որպես փաստաբան: Ղեկավարվելով նորմատիվ ակտի պահանջներով՝ ՀՀ ոստիկանության պետի հրամանով փաստաբանի արտոնագիր ստացած դիտորդների խմբի անդամի լիազորությունները դադարեցվել են, որը դիտորդների խմբի կողմից նույնպես դիտվել է որպես խմբի գործունեության խոչընդոտում: Այդ կապակցությամբ 06.05.2015 թ. «Մեդիա կենտրոն»-ում կայացել է ասուլիս՝ ոստիկանության ներկայացուցչի մասնակցությամբ, ում կողմից հարցին տրվել է օրենքից բխող հիմնավոր եւ սպառիչ պատասխան: Նույն ասուլիսի ընթացքում փաստաբանի արտոնագիր ստացած դիտորդների խմբի նախկին անդամ Ա. Հարությունյանը հրապարակավ հայտնել է, որ դիտորդների խմբի նախագահ Հ. Սահակյանը քաջատեղյակ է եղել փաստաբանի արտոնագիր ստանալու մասին եւ առաջիններից մեկն է եղել, որ շնորհավորել է իրեն: Սակայն անտեսելով նշված հանգամանքը՝ խմբի նախագահ Հ. Սահակյանը գիտակցաբար ու միտումնավոր խախտելով իրավական նորմի պահաջները` այդ մասին տեղյակ չի պահել ՀՀ ոստիկանությանը: Ավելին, արդեն իսկ փաստաբանի արտոնագիր ստացած Ա. Հարությունյանի հետ այցելություններ է կատարել ՁՊՎ-ներ: Խմբի նախագահ Հ. Սահակյանի նման վարքագիծը մտահոգության տեղիք է տալիս:
3. Անդրադառնալով 13.05.2015 թ. դիտորդների խմբի հերթական այցելությանը, նշենք, որ ՁՊՎ վարչակազմից դիտորդները կրկին պահանջել են ձերբակալվածների անձնական գործերում պահվող գրագրությունները, որոնց չտրամադրումը նույնպես դիտվել է որպես խմբի աշխատանքների խոչընդոտում:
Հարկ է նշել, որ վերջին ժամանակներում խումբը որդեգրել է փաստերի խեղաթյուրման գործելաոճ, այն է՝ նախկին անդամ Ս. Իսկանդարյանին ներկայացրել են որպես խմբի փորձագետ, որը նույնպես իրավական նորմի պահանջի խախտում է:
ՀՀ ոստիկանությունը հաշվի առնելով Ս. Իսկանդարյանի՝ խմբի կազմում ունեցած երկար տարիների փորձը, ողջունեց նրա որդու համալրումը խմբի կազմում, սակայն չբավարարվելով դրանով, դիտորդների խումբը համառ կերպով ցանկանում է Ս. Իսկանդարյանին ներգրավվել որպես փորձագետ, ինչը որեւէ իրավական ակտով նախատեսված չէ: Ավելին, ոստիկանության ներկայացուցիչները մի քանի անգամ փորձել են կապ հաստատել դիտորդների խմբի անդամների հետ, իրենց իսկ կողմից պատրաստված եւ ՁՊՎ-ներին տրամադրված ցուցապաստառի վրա նշված «Թեժ գիծ» հեռախոսահամարի միջոցով, սակայն հեռախոսազանգերին պատասխանել են ոչ թե դիտորդների խմբի անդամները, այլ խմբի նախկին անդամ Ս. Իսկանդարյանը:
Այս ամենից հետո` դիտորդների խումբը միտումնավոր խախտելով իրավական ակտի պահանջներն ու ոտնահարելով ձերբակալված անձանց իրավունքները, փոխանակ միջոցներ ձեռնարկի իր աշխատելաոճը փոխելու եւ իրավական ակտի պահանջները պահպանելու համար, ոստիկանությանն անհիմն մեղադրում է իրենց աշխատանքները խոչընդոտելու մեջ:
ՀՀ ոստիկանությունը ոչ թե խոչընդոտել, այլ նպաստել է դիտորդների խմբի արդյունավետ գործունեությանը եւ համատեղ աշխատանքի արդյունքում վերջին տարիների ընթացքում բավականին դրական փոփոխություններ եւ առաջընթացներ են արձանագրվել ձերբակալված անձանց կենցաղային պայմանների բարելավման եւ իրավունքների պահպանման ուղղությամբ, ինչի մասին բազմիցս նշել է նաեւ դիտորդների խումբը:
ՀՀ ոստիկանությունն այսուհետ եւս իրականացնելու է օրենքով իր առջեւ դրված պահանջները՝ խստորեն պահպանելով օրենքի տառը, ինչը հորդորում է նաեւ դիտորդների խմբին:
Ոստիկանության խոչընդոտները Դիտորդական խմբի աշխատանքներին հասել է իր գագաթնակետին





























