Նախընտրելի
Հակաականային գործողությունների ազգային մարմինը` «Հումանիտար ականազերծման եւ փորձագիտական կենտրոն» ՊՈԱԿ-ը (ՀԱՓԿ ՊՈԱԿ) ՀՀ Սյունիքի մարզի Սրաշեն համայնքում ականազերծված եւ ստուգազննված տարածքները (18 281 քմ. ընդհանուր մակերեսով) հանձնեց Սյունիքի մարզպետարանին:
Հանձնման արարողությանը մասնակցում էին ՀՀ Սյունիքի մարզպետի տեղակալ Վաչե Գրիգորյանը, Սրաշենի եւ Ներքին Հանդի գյուղապետերը, ՀԱՓԿ ՊՈԱԿ-ի աշխատակիցները, ՀՀ ՊՆ խաղաղապահ ինժեներական սակրավորային գումարտակի հրամանատարը, «ՀԱԼՕ Թրաստ-Հայաստան» կազմակերպության ղեկավարությունը, ինչպես նաեւ ԱՄՆ պետդեպարտամենտի ռազմաքաղաքական հարցերով բյուրոյի զենքերի ոչնչացման եւ նվազեցման գրասենյակի (WRA) ծրագրերի համակարգողներ Կատիե Քոֆիեն եւ Մրֆի Մքլոյը:
Հանձնման արարողության ընթացքում մարզպետի տեղակալը իր գոհունակությունը հայտնեց ականազերծման աշխատանքների իրականացման մասնակիցներին եւ կարեւորեց կատարված աշխատանքները՝ նշելով, որ համայնքի բնակիչներն արդեն կարող են օգտագործել մաքրված հողատարածքները գյուղատնտեսական նշանակությամբ:
Սյունիքի մարզում ականազերծման աշխատանքներն իրականացվում են «ՀԱԼՕ Թրաստ-Հայաստան» կազմակերպության եւ ՀՀ ՊՆ խաղաղապահ ինժեներական սակրավորային գումարտակի ուժերով՝ ԱՄՆ պետդեպարտամենտի ռազմաքաղաքական հարցերով բյուրոյի զենքերի ոչնչացման եւ նվազեցման գրասենյակի (WRA) ծրագրերի օժանդակությամբ:
