նախընտրելի դարձնել
Տավուշի մարզի սահմանամերձ գյուղերի բնակիչները հակառակորդի կրակահերթերի պատճառով չեն կարողանում հավաքել խաղողի բերքը։
Սահմանամերձ Պառավաքարի բնակիչները օրեր առաջ հրաշքով են փրկվել, երբ դաշտում խաղողի բերքը հավաքելու ժամանակ հակառակորդը սկսել է գնդակոծել տարածքը: Գնդակոծության հետեւանքով խաղողագործներից մեկի մեքենան հրդեհվել է, իսկ բերքահավաք անողները հազիվ են կարողացել անվտանգ վայր տեղափոխվել:
Գյուղացիները ամիսներ առաջ էլ կարկտահարության հետեւանքով կորցրել էին իրենց ցորենի ու գարու բերքը: Բերդավանցիները մինչեւ այժմ դրա դիմաց փոխհատուցում չեն ստացել:
«Ամբողջ տարին գյուլլի բերան աշխատեցինք, հող մշակեցինք, կարկուտը սրբեց, տարավ, հիմա էլ թուրքը չի թողում տոննաներով ապրուստը հավաքենք: Գարնանը կարկուտը 100 տոկոսով վերացրեց ցորենի ու գարու ցանքատարածությունները, դեղձի այգիներն էլ ամբողջությամբ վնասվեցին, բայց մի կոպեկի փոխհատուցում չստացանք»,- NEWS.am-ին բողոքեց գյուղացիներից մեկը:
Մարզի գլխավոր գյուղատնտեսը NEWS.am-ի հետ զրույցում նշեց, որ կարկուտից 100 տոկոսով վնասել էին Արճիս, Լճկաձոր, Այրում, Բերդավան գյուղերի այգիներն ու ցանքատարածությունները, տներն ու շինությունները, սակայն փոխհատուցում տրվել է միայն վնասված շինությունների համար:
Այս տարվա բերքի կեսից ավելին կորցրած տավուշցիները Կառավարությունից խնդրում են նաեւ ցածրացնել ոռոգման ջրի սակագինը, որպեսզի կարողանան այգիները ոռոգել՝ հաջորդ տարի բերք ստանալու հույսով:
