«Տաթեւեր» ճոպանուղին արդեն հինգ տարեկան է, որի ընթացքում ճոպանուղուց օգտվել է շուրջ 430 000 ուղեւոր:

Հինգ տարի առաջ, 2010 թվականի հոկտեմբերի 16-ին գործարկվեց աշխարհի ամենաերկար հետադարձելի ճոպանուղին՝ անցնելով Որոտանի կիրճի վրայով եւ հնարավորություն ընձեռելով Հալիձորից Տաթեւի միջնադարյան վանական համալիր հասնել կարճ, հարմարավետ օդային ճանապարհով:

Գործարկումից ի վեր ճոպանուղուց օգտվել է շուրջ 430 000 ուղեւոր, միայն այս տարվա ինն ամիսների ընթացքում՝ շուրջ 90 հազար այցելու: Մինչեւ ճոպանուղու կառուցումը տարեկան Տաթեւ այցելողների թիվը չէր գերազանցում 7 հազարը:

Զբոսաշրջային հոսքերի աճը նաեւ նպաստել է համապատասխան ենթակառուցվածքների զարգացմանը. վերջին հինգ տարվա ընթացքում Գորիսում բացվել է 10 նոր հյուրանոց, վանական համալիրի հարակից համայնքներում գործում են շուրջ երկու տասնյակ հյուրատներ, սպասարկման այլ օբյեկտներ:

«Ճոպանուղին նաեւ նպաստում է հանրապետության «Հարավային միջանցք» ուղղության զարգացմանը, քանի որ դեպի Տաթեւ ուղեւորվող զբոսաշրջիկները ճանապարհին կանգ են առնում Խոր Վիրապում, Նորավանքում, Արենիում եւ Զորաց քարերում, օգտվում են մատուցվող տարբեր ծառայություններից», - նշում է «Տաթեւի վերածնունդ» ծրագրի ղեկավար Հայկ Թութունջյանը:

«Տաթեւեր»-ի առաջին հոբելյանի կապակցությամբ կազմակերպված միջոցառման ընթացքում «Տաթեւի վերածնունդ» ծրագրի ղեկավար Հայկ Թութունջյանը շնորհակալագրեր հանձնեց զբոսաշրջային ընկերությունների ներկայացուցիչներին՝ համագործակցության եւ Տաթեւը՝ որպես զբոսաշրջային ուղղություն զարգացնելու գործում ունեցած ներդրման համար:

« Գարնանը ներդրվել էր աշխարհում լավագույններից մեկը համարվող՝ SKIDATA ընկերության տոմսերի վաճառքի միջազգային համակարգը, իսկ ամռանը, զբոսաշրջային ամենաակտիվ շրջանում, գործարկվեց տոմսերի վաճառքի օնլայն համակարգը՝ էապես հեշտացնելով տոմսերի ձեռք բերման գործընթացը»,- նշում է «Տաթեւեր»-ի տնօրեն Վահե Բաղդասարյանը:

Նշենք, որ «Տաթեւեր» ճոպանուղին կառուցվել է «Հայաստանի զարգացման նախաձեռնություններ» (IDeA) հիմնադրամի «Տաթեւի վերածնունդ» ծրագրի շրջանակում: Այն գրանցված է Գինեսի ռեկորդների գրքում՝ ոչ միայն որպես աշխարհի ամենաերկար հետադարձելի, այլեւ որպես ամենակարճ ժամանակահատվածում (10 ամիս) կառուցված ճոպանուղի: