Թուրքիայի արտգործնախարար Ահմեդ Դավութօղլուն,  Իգդիրի եւ Աղրըի նահանգներին մոտիկից ծանոթանալու համար ինքնաթիռով ժամանել է Կարս, որտեղ անդրադարձել է Կովկասում խաղաղության հաստատման ուղղությամբ արվող քայլերին։

Թուրքական Haberler-ի փոխանցմամբ՝  Դավութօղլուն նշել է, որ Կովկասում խաղաղության եւ կայունության ապահովման համար անհրաժեշտ է, որ լուծվի Ադրբեջանի եւ Հայաստանի միջեւ հակամարտությունը։ «Բարգավաճման հասնելու համար անհրաժեշտ է սահմանները բացել։  Հայաստանը եւ Ադրբեջանը բարգավաճման կհասնեն միասին խաղաղության հասնելով։ Նախորդ տարի հայ-թուրքական արձանագրությունները ստորագրվեցին «Թող խաղաղություն լինի» կարգախոսով։  Արձանագրությունների ստորագրումով  բավական դրական զարգացումներ են գրանցվել։  Թուրքիայի արեւելյան սահմանների բացման ուղղությամբ աշխատանքները շարունակվում են։ Այդ ուղղությամբ մեր աշխատանքները գիշեր-ցերեկ ընթանում են»-նշել է Թուրքիայի արտգործնախարարը։

Այնուհետ, Թուրքիայի արտգործնախարարը Իգդիրի նահանգապետի հետ մեկնել է  Ալիջան-Մարգարա սահմանակետ։