Վարչապետ Հովիկ Աբրահամյանը մասնակցել է Հայաստանի պետական տնտեսագիտական համալսարանի խորհրդի նիստին, որի օրակարգային առաջին հարցով տեղի է ունեցել խորհրդի նախագահի ընտրություն: ՀՀ կրթության եւ գիտության նախարար Արմեն Աշոտյանը բուհի խորհրդի նախագահի պաշտոնում առաջադրել է վարչապետ Աբրահամյանի թեկնածությունը: Խորհրդի անդամների քվեարկության արդյունքում Հովիկ Աբրահամյանը միաձայն վերընտրվել է ՀՊՏՀ խորհրդի նախագահ: Վարչապետը շնորհակալություն է հայտնել վստահության համար եւ նշել, որ առաջիկա 5 տարիներին միասին կշարունակեն իրականացնել ՀՊՏՀ-ի արդյունավետ գործունեությանն ու հետագա զարգացմանն ուղղված քաղաքականությունը:  

Այնուհետեւ ՀՊՏՀ ռեկտոր Կորյուն Աթոյանը հանդես է եկել համալսարանի 2015 թվականի ուսումնագիտական ու ֆինանսատնտեսական գործունեության արդյունքների եւ 2015 թվականի բյուջեի նախագծի հիմնական ցուցանիշների մասին զեկույցով: Ռեկտորն անդրադարձել է ուսումնական գործընթացի կազմակերպմանն ու կատարելագործմանն ուղղված աշխատանքներին, ուսանողների առաջադիմությանը, գիտական գործունեությանը, փորձառության կազմակերպմանը, հասարակայնության հետ կապերին, բուհի միջազգայնացմանն ու տնտեսական գործունեությանը: Կորյուն Աթոյանի խոսքով՝ բուհի հիմնական խնդիրն է եղել եւ շարունակում է մնալ աշխատաշուկայում մրցունակ ու բարձր որակավորում ունեցող մասնագետների պատրաստումը: Համալսարանում իրականացվող բարեփոխումներն ուղղված են կրթության արդյունավետության բարձրացմանը, միջազգային կապերի զարգացմանն ու ընդլայնմանը, արտերկրի համալսարանների հետ համագործակցության խորացմանը: Անցնող տարում ՀՊՏՀ-ն դարձել է Եվրասիական համալսարանների ասոցիացիայի անդամ, կնքվել է միջազգային 17 պայմանագիր: Զեկույցի ընթացքում ռեկտորը ներկայացրել է նաեւ համալսարանի 2016 թվականի համար նախատեսվող բյուջեի նախագծի ցուցանիշները:

Նիստի արդյունքներով խորհուրդը քննարկել եւ հավանություն է տվել ՀՊՏՀ-ի 2015 թվականի ուսումնամեթոդական, գիտահետազոտական ու ֆինանսատնտեսական գործունեությանը, համալսարանի 2015 թ. բյուջեի կատարման արդյունքները գնահատել բավարար եւ հաստատել համալսարանի 2016 թ. բյուջեն:

 Ամփոփելով խորհրդի աշխատանքները՝ վարչապետը նշել է, որ որակյալ կադրերի պատրաստման, համալսարանի մրցունակության եւ հեղինակության բարձրացման համար բուհի ղեկավարության եւ աշխատակիցների ջանքերն արդյունավետ են եղել: «Համաշխարհային տնտեսական զարգացումներն առաջադրում են նոր խնդիրներ, որոնց լուծման, երկրների տնտեսությունների ուժեղացման համար անհրաժեշտ է ունենալ բարձրորակ կրթությամբ մասնագետներ: Այս առումով ՀՀ կառավարությունը նույնպես կարեւորում է բարձրորակ տնտեսագետների պատրաստման գործը, որը վստահված է նաեւ ձեզ՝ հարգելի համալսարանականներ»,- ասել է Հովիկ Աբրահամյանը: Վարչապետի խոսքով՝ Տնտեսագիտական համալսարանն իր ներուժով պետք է աջակից լինի կառավարությանը՝ տնտեսական քաղաքականության իրականացման գործում: Այս առումով, գործադիրի ղեկավարը գովելի է համարել այն, որ կառավարության տնտեսական զարգացման քաղաքականության գերակայությունները համալսարանի պրոֆեսորադասախոսական կազմի, ասպիրանտների եւ ուսանողների կողմից դարձել են հետազոտության թեմաներ: «2015թ. Տնտեսագիտական համալսարանում շարունակվել է բարեփոխումների եւ զարգացման քաղաքականությունը: Կրթության որակի բարելավումը,  գիտահետազոտական աշխատանքների շարունակումը, աշխատակիցներին եւ ուսանողներին հասցեագրված սոցիալական քաղաքականությունը, միջազգային կապերի աշխուժացումը, տեխնիկական վերազինումը, ուսանողների հաջողությունները տարբեր ոլորտներում փաստում են, որ համալսարանը տարեցտարի զարգանում եւ մրցունակ է դառնում: Կրթության որակի բարելավման ուղղությամբ   կատարված քայլերից կարեւորում եմ համալսարանի հավատարմագրման փաստը: Այս բոլոր հաջողությունները նպաստում են բուհի հեղինակության բարձրացմանը եւ հպարտանալու առիթներ ընձեռում»,- նշել է վարչապետը:

Ամփոփելով խոսքը՝ Հովիկ Աբրահամյանը նշել է, որ համալսարանի 2015 թվականի բյուջեի կատարման արդյունքները գոհացուցիչ են եւ ցույց են տալիս, որ բյուջեն արդյունավետ ու խնայողաբար է տնօրինվել: Ըստ նրա, արդյունքները տեսանելի են բուհի գործունեության բոլոր ուղղություններում՝ սոցիալական ծրագրերից մինչեւ բուհական միջավայրի արդիականացում: Վարչապետի խոսքով՝  2016թ. բյուջեի նախագիծը ցույց է տալիս, որ առկա միտումները կպահպանվեն նաեւ գալիք տարում: