ՆախընտրելիՉեխիայի եւ Սլովակիայի 1993 թվականի «խաղաղ ապահարզանը» պետք է օրինակ ծառայի նախ եւ առաջ Ադրբեջանի համար: Այս մասին հունվարի 18-ին, Չեխիայի խորհրդարանի Սենատի փոխնախագահ Զդենեկ Շկրոմախի հետ հանդիպման ժամանակ նշել է աշխատանքային այցով Չեխիայում գտնվող ՀՀ ԱԺ փոխնախագահ, Հայաստան-Չեխիա պատգամավորական բարեկամության խմբի ղեկավար Էդուարդ Շարմազանովը:
ՀՀ ԱԺ փոխնախագահ Էդուարդ Շարմազանովի աշխատակազմից NEWS.am-ին հայտնում են, որ ԱԺ փոխնախագահն իր երախտագիտությունն է հայտնել չեխ գործընկերոջը` Երեւանում Հայոց ցեղասպանության 100-րդ տարելիցի ոգեկոչման արարողություններին մասնակցելու համար:
Երկուստեք արձանագրվել է, որ Հայաստանի Ազգային ժողովի եւ Չեխիայի Սենատի հարաբերությունները զարգանում են դինամիկ կերպով, կարեւորվել են փոխայցելությունները եւ գործնական սերտ շփումները: Չեխիայի Սենատի փոխնախագահն ընդգծել է Հայաստանի խորհրդարանի հետ հարաբերությունների հետագա խորացման անհրաժեշտությունը:
Հանդիպմանն անդրադարձ է կատարվել նաեւ տարածաշրջանային խնդիրներին: Կողմերը նշել են, որ հակամարտությունները պետք է կարգավորվեն բացառապես խաղաղ ճանապարհով:
ԱԺ փոխնախագահն ընդգծել է, որ Չեխիայի եւ Սլովակիայի 1993 թվականի «խաղաղ ապահարզանը» պետք է օրինակ ծառայի նախ եւ առաջ Ադրբեջանի համար: «Արցախի ժողովուրդը նույնքան իրավունք ունի իր ճակատագիրը տնօրինելու, որքան ցանկացած այլ քաղաքակիրթ երկրի ժողովուրդ»,-նշել է Էդուարդ Շարմազանովը:
Կողմերը կարեւորել են ՀՀ-Եվրամիություն քաղաքական երկխոսության շարունակականությունը:
Հանդիպման ավարտին ԱԺ փոխնախագահը Զդենեկ Շկրոմախին հրավիրել է պաշտոնական այց կատարել Հայաստան:
